БАНКАТА НА АМЕРИКА Е КАЗНЕТА СО 1,2 МИЛИЈАРДИ ДОЛАРИ Со години криела сомнителни трансакции и ги кршела санкциите

Банката на Америка е казнета со 1,2 милијарди долари затоа што не успеа да открие можно перење пари и други нелегални активности, објави Министерството за финансии на САД.

Големата банка не пријавила на владата сомнителни активности во вредност од повеќе од 5 милијарди долари, а според Министерството, една милијарда долари од таа сума претставувала ризик за националната безбедност и била поврзана со нелегално финансирање.

Меѓу пропустите е и неуспехот на банката да ги евидентира трансакциите за кои се сомнева дека се поврзани со кинески мрежи за перење пари, како и перењето пари преку трговија што имала „значајни врски со југозападната граница“.

– Нашиот тим веќе постигна значителен напредок во решавањето на проблемите што ги посочија регулаторите и ние сме посветени на завршување на таа работа – изјавија од Банката на Америка за Би-Би-Си.

Министерот за финансии на САД Скот Бесент, при објавувањето на казната, која е трета најголема во историјата на министерството, објасни дека неуспехот има пошироки последици.

-Кога банка од оваа големина не ги исполнува своите обврски во спречувањето на перење пари и спроведувањето санкции, последиците се протегаат далеку над нејзините граници. Ова го изложува целиот американски финансиски систем на значителни ризици од нелегално финансирање – рече Бесент.

Министерството за финансии истакнува дека банката премногу се потпирала на барања од надворешни актери, како што се полицијата и други финансиски институции, наместо да ги применува сопствените внатрешни контроли.

Со ова, банката „практично голем дел од своите обврски за проактивно откривање и известување им ги оставила на трети страни“, се наведува во соопштението за медиумите.

Како дел од спогодбата, Банката на Америка призна дека „намерно го прекршила“ Законот за банкарска тајна. Банката потврди дека не одржувала соодветна програма за спречување на перење пари, не спровела потребни проверки на странски дописнички сметки и не поднела извештаи за сомнителни активности.

Вкупната казна од 1,2 милијарди долари се состои од санкции изречени од Канцеларијата на контролорот на валутата (OCC) и Канцеларијата за контрола на странски средства (OFAC).

Казната од 750 милиони долари на OCC е најголемата санкција што некогаш ја изрекол регулаторното тело.

OFAC објави дека нивната спогодба со банката опфаќа 475 очигледни прекршувања на програмата за санкции. Меѓу нив се прекршувања на санкциите против Русија и Иран, како и оние поврзани со трговијата со дрога и глобалниот тероризам.

Спогодбата од 11,6 милиони долари се базира на проценката на OFAC дека прекршувањата на Банката на Америка не биле „скандалозни“.