🎥„НЕ ТРЕБА ДА СИ ТУКА, НЕЛИ НЕМА ДА ИЗВЕСТУВАТЕ ЗА МЕНЕ“ Трамп вербално нападна новинарка во седиштето на ООН
Репортерката побара од Трамп да ги коментира најновите анкети, кои покажуваат дека дури две третини од Американците мислат дека САД ја губат војната во Иран.
За време на Генералното собрание на Обединетите нации во Њујорк, американскиот претседател Доналд Трамп вербално нападна новинарка на Си-ен-ен велејќи ѝ дека воопшто не треба да известува за настанот.
Изненадувачкиот судир се случи во пресрет на официјалниот говор на Трамп пред светските лидери, кога тој одговараше на прашања од присутните новинари. Репортерката го замоли да ги коментира најновите анкети на јавното мислење, кои покажуваат дека дури две третини од Американците мислат дека САД ја губат војната во Иран.
Трамп избегна директен одговор на прашањето и го фокусираше својот напад врз новинарката и нејзината матична куќа. Тој го изрази своето изненадување што Си-ен-ен воопшто ги следи неговите активности, наведувајќи дека претходно посочиле дека нема да го прават тоа и порачувајќи дека не ѝ е местото таму.
Минатиот петок Трамп ја објави одлуката за забрана на пристапот до Белата куќа за Си-ен-ен, МС-нау и Политико, по што на новинарите од тие медиуми им беше забранет влез на претседателските настани во саботата. Тој потег предизвика остра реакција од медиумската заедница, а како знак на солидарност, телевизиската група од Белата куќа привремено го прекина покривањето на настаните кои бараат заедничко известување.
Забраната за пристап до Белата куќа, сепак, не се однесува на седиштето на Обединетите нации, каде што процесот на акредитација независно го управува ОН, што им овозможи на новинарите од засегнатите медиуми да присуствуваат на самитот.
Во меѓувреме, Си-ен-ен, МС-нау и Политико поднесоа тужба против Белата куќа повикувајќи се на Првиот амандман од Уставот на САД, обвинувајќи за незаконско прекинување на новинарските права. Експертите велат дека досегашната судска пракса е во корист на медиумските куќи кои тужат.
Trump: “I’m surprised CNN is here is covering me. You shouldn’t be here.”
CNN’s Kaitlan Collins: “The United Nations allowed us in, sir.” pic.twitter.com/fMrWCnABEO
— philip lewis (@Phil_Lewis_) September 22, 2026