КАДЕ СЕ ЖИВЕЕ НАЈДОБРО, А КАДЕ НАЈЛОШО – СВЕТСКА РАНГ ЛИСТА Словенија и Хрватска меѓу топ-20, Македонија во долниот дел на табелата

Регионот покажува големи разлики во годинашниот преглед на животниот стандард што го објави ВПР (World Population Review). Словенија е најдобро рангирана, на 19 место, со 182,40 поени, веднаш пред Хрватска, која со 181,70 поени го зазема 20 место.

Тие се единствените земји од регионот меѓу првите 20, за разлика од Македонија, која е рангирана на 62 место на листата и Србија на 58. Босна и Херцеговина не е наведена во табелата на која се рангирани вкупно 86 земји.

Листата „Стандард на живеење по земји 2026“, последен пат ажурирана на 18 септември, се заснова на индексот за квалитет на живот на Нумбео (Numbeo). Во главната табела се прикажани податоци за 2025 година.

На врвот на листата е Луксембург, со индекс од 218,20 поени. Следуваат Холандија со 216,50 и Данска со 215,10 поени. Идентичен резултат од 215,10 поени има и Оман, по кој следуваат Швајцарија со 210,90, Финска со 208,30, Норвешка со 199,20, Исланд со 198, Австрија со 197,70 и Германија со 195,20 поени. Меѓу првите 15 се и Австралија со 195,10, Нов Зеланд со 194,70, Шведска со 192,20, САД со 192,10 и Естонија со 189,80 поени.

Според ВПР, земјите со највисок животен стандард најчесто ги комбинираат економскиот просперитет, стабилното управување, развиените јавни услуги и високото ниво на лична безбедност.

Најдолу на листата на 86 место е Нигерија, со само 15,60 поени. Меѓу трите најслабо оценети земји се и Венецуела со 73,70 и Бангладеш со 77 поени.

Ниските резултати најчесто се поврзуваат со ограничен пристап до здравствена заштита, економска нестабилност, еколошки проблеми, инфраструктурни недостатоци и слабости во безбедноста и јавните услуги.

Индексот на Нумбео, употребен за рангирањето, обединува осум фактори: куповна моќ, безбедност, здравствена заштита, трошоци за живот, сооднос меѓу цените на недвижностите и приходите, време поминато во сообраќај, загадување и клима.

ВПР потсетува дека други системи може поинаку да ги рангираат земјите поради различните методологии, извори на податоци и тежината што им ја доделуваат на поединечните фактори.