🎥 ВО МОСКВА РАСПОРЕДЕН „ПАНЦИР“ НА УЛИЦА Противвоздушниот систем ќе ја чува големата рафинерија од украински напади

Русија го распореди противвоздушниот систем „Панцир“ над еден од најпрометните булевари во Москва, недалеку од рафинеријата за нафта Капотња, која беше погодена пред два дена во голем украински напад со дронови.

Снимките што кружат на социјалните мрежи го покажуваат „Панцир“ поставен на надвозник, над автомобили што минуваат по автопатот.

Системот е распореден во непосредна близина на важниот енергетски објект кој беше тешко оштетен во нападот на 20 септември. Московската рафинерија управувана од Гаспромнефт, според Ројтерс, по нападот престанала со преработката на сурова нафта. Во двете главни единици избувнаа пожари, а поправките и рестартирањето на производството би можеле да потраат неколку недели.

Footage shows a Russian Pantsir air defense system positioned above a major Moscow highway, adjacent to an oil refinery.pic.twitter.com/kBnY5ZQuFr

— Open Source Intel (@Osint613) September 21, 2026

Градоначалникот на Москва, Сергеј Собјанин, претходно потврди дека индустриски објект во областа на рафинеријата е оштетен за време на нападот со беспилотни летала.

Украинската безбедносна служба ја презеде одговорноста за нападот, наведувајќи дека во него учествувале неколку единици.

Оваа рафинерија е еден од најважните руски капацитети за преработка на нафта. Во текот на 2024 година таа преработе 11,6 милиони тони сурова нафта и произведе 2,9 милиони тони бензин и 3,2 милиони тони дизел гориво.

Францускиот претседател Емануел Макрон на маргините на Генералното собрание на ОН во Њујорк предложи мораториум за меѓусебни напади од страна на Украина и Русија врз енергетскиот сектор. По средбата со американскиот претседател Доналд Трамп, Макрон објави на Икс дека разговарале како да „обезбедат мораториум за нападите врз енергетската инфраструктура преку заеднички напори“. Подоцна истиот ден Макрон разговараше и со украинскиот претседател Володимир Зеленски за перспективите за енергетско примирје.

Иницијативата на Макрон се совпаѓа со зголемениот притисок од Доналд Трамп врз украинскиот претседател за Киев да ги запре нападите врз рускиот енергетски сектор.

– Господинот Зеленски мора да направи едно нешто. Мора да престане да ги уништува резервите на дизел гориво на Русија – рече Трамп на 13 септември.

Еден ден подоцна, тој напиша на социјалните медиуми дека глобалниот пораст на цените на дизелот е главно предизвикан од војната меѓу Русија и Украина, а не од Иран.

И покрај повиците на Трамп, Украина не ги запре нападите врз руските рафинерии.