„АНТРОПИК“ САКА 10 ПАТИ ДА ГО ЗАБРЗА РАЗВОЈОТ НА ЛЕКОВИ Вештачката интелигенција влегува во лабораторија

Компанијата за вештачка интелигенција „Антропик“ отвори сопствена биолошка лабораторија во областа на заливот Сан Франциско, со амбиција технологијата да помогне многу побрзо да се стигнува од научна идеја до потенцијален нов лек.

Целта што се појавува и во огласите за нови експерти е амбициозна – биолошките истражувања да се забрзаат за цел ред на големина, односно околу 10 пати.

Компјутерските симулации за компанијата веќе не се доволни. Она што ќе го предложи вештачката интелигенција треба да помине низ вистински експеримент.

– Веруваме дека крајниот тест во биологијата сè уште е, и уште некое време ќе биде, вистинската лабораториска работа – вели Ерик Каудерер-Абрамс, раководител на биолошките науки во „Антропик“.

„Клод“ ќе работи и со роботи

Еден од најинтересните експерименти е поврзувањето на „Клод“ со роботизирана лабораториска опрема. Компанијата сака да утврди колкав дел од научниот експеримент може да го планира и спроведе вештачката интелигенција со ограничена човечка интервенција.

Човекот, сепак, останува во лабораторијата. „Антропик“ нагласува дека човечкиот надзор е неопходен, особено поради безбедноста.

– Само сме на почетокот на користењето на вештачката интелигенција за автоматизирање на лабораториската работа – вели Каудерер-Абрамс.

Токму автоматизацијата би можела да им овозможи на научниците многу побрзо да тестираат идеи, молекули и биолошки цели, наместо секој чекор да го изведуваат рачно.

Шанса и за запоставените болести

„Антропик“ гледа посебна можност таму каде што традиционалната фармацевтска индустрија потешко наоѓа економска сметка. Компанијата сака вештачката интелигенција да се користи и за болести и биолошки цели за кои развојот на лекови досега бил премногу тежок или недоволно комерцијално привлечен.

Амбицијата не значи дека лек создаден од „Клод“ наскоро ќе стигне во аптеките. Дури и кога ќе се пронајде перспективна молекула, потребни се години за испитување на нејзината безбедност и ефикасност, а „Антропик“ не планира самостојно да спроведува клинички испитувања.

Компанијата веќе ги нуди своите алатки на големи фармацевтски компании, меѓу кои „Џенентек“, „Бристол Мајерс Сквиб“ и „Ново Нордиск“. Во одборот на директори се приклучи и извршниот директор на „Новартис“, Вас Нарасимхан, а „Антропик“ го купи и стартапот „Коефициент Био“.

Биологијата во меѓувреме стана една од најголемите инвестиции на компанијата според бројот на луѓе и ресурсите. Новата лабораторија веќе бара експерти за протеини, нуклеински киселини, лабораториски операции и за опрема.