ДИ КАПРИО И ЏЕФ БЕЗОС ЌЕ ГИ СПАСУВААТ ЗАГРОЗЕНИТЕ ВИДОВИ Фонд од 200 милиони долари за 100 животински видови на изумирање
Холивудскиот актер Леонардо Дикаприо и основачот на Амазон, Џеф Безос, најавија фонд од 200 милиони долари за заштита на видовите кои се на работ на изумирање.
Под името „Phoenix Species Project“, актерот Леонардо ди Каприо и основачот на „Амазон“, Џеф Безос преку своите фондации „Re:wild“ и „Earth Fund“, започнаа иницијатива вредна 200 милиони долари за спасување на 100 најзагрозени животински видови на Земјата.
Во фокусот на иницијативата ќе бидат опфатени десетици ретки видови од различни делови на светот, вклучувајќи лемури, саламандери, жаби, желки, игуани и други загрозени животни. Меѓу нив се и златнокрунестата сифака, висајанската брадавичеста свиња, малајскиот панголин, розовата копнена игуана и долгоклуната ехидна на Атенборо, за кои се потребни итни мерки за зачувување на популацијата.
Проектот во соработка со локалните власти, еколошките организации и претставници на домородните заедници, има за цел да обезбеди секојдневна поддршка за програми што опфаќаат обновување на популациите на најзагрозените животински видови, како и зачувување на нивните природни живеалишта.