МЕРЦ САКА ПРОТЕКЦИИ ЗА АВТО-ИНДУСТРИЈАТА, МАКРОН ДА ПОМИНЕ „MADE IN EUROPE“ Што ќе речат другите во ЕУ за големиот договор Берлин – Париз?

Францускиот претседател Емануел Макрон и германскиот канцелар Фридрих Мерц на последниот состанок во Германија покренаа иницијативата за нов голем договор меѓу Париз и Берлин. Владите на двете земји се обврзаа да постигнат договор што треба да ја зајакне европската индустрија и да му помогне на автомобилскиот сектор.

Спогодбата би го поврзала инсистирањето на Франција за заштита на европскиот пазар со напорите на Германија за ублажување на последиците од кризата во автомобилската индустрија, која стана особено изразена по најавата на „Фолксваген“ за намалување на 100.000 работни места, пишува Политико.

Рамковниот договор предвидува Берлин да поддржи построги одредби „Произведено во Европа“ што Париз ги бара според клучниот Закон за индустриско забрзување на ЕУ. Ова би го ограничило кругот на трговски партнери кои можат да добијат статус на сигурен партнер, што е услов за пристап до програми за јавни набавки и субвенции.

За возврат, Франција, на барање на Берлин, би се согласила да ја ублажи планираната забрана за продажба на нови автомобили со мотори со внатрешно согорување од 2035 година.

– Ни беше доделена задача да изготвиме сеопфатен договор за овие теми. Би било одлично да се постигне договор на есен. Сигурен сум дека би можеле да ги освоиме другите земји, како Италија. Сите чекаат француско-германски договор – изјави францускиот министер за индустрија, Себастијан Мартин, за Политико.

Тој  наведува дека целта е да се постигне договор пред состанокот на министрите за индустрија на ЕУ на 24 септември и самитот на лидерите на ЕУ на 15 и 16 октомври.

Макрон и Мерц ветија дека ќе ги усогласат приоритетите, вклучително и финализирањето на следниот седумгодишен буџет на ЕУ, но нагласија итноста од враќање на европската економија на вистинскиот пат.

Германија и нејзината автомобилска индустрија долго време бараат ублажување на забраната за мотори со внатрешно согорување од 2035 година. Тие веруваат дека на производителите треба да им се даде поголема флексибилност и дека алтернативните горива треба да играат позначајна улога.

Франција долго време ја бранеше оваа цел како еден од темелите на Европскиот зелен план, но Макрон неодамна стана покритичен кон делови од зелената агенда. Париз неодамна стави до знаење дека е отворен за флексибилност за производителите кои ги зајакнуваат европските синџири на снабдување и локалното производство.

Постојат поголеми несогласувања околу Законот за индустриско забрзување. Предлогот, за кој се залага францускиот комесар за економија Стефан Сежурн, ќе им даде предност на европските компании во јавните набавки и субвенциите. Германија е претпазлива кон одредбите за кои верува дека би можеле да ги оштетат односите со важните трговски партнери.

За да се исполнат трговските обврски на Унијата, Европската комисија предложи придобивките да се прошират на група сигурни партнери надвор од ЕУ. Нивните стоки би се сметале за европски ако ги исполнуваат критериумите што сè уште не се дефинирани.

Германија претходно се залагаше за вклучување на сојузници како што се Обединетото Кралство и Канада, додека Франција сака да ја ограничи етикетата „Произведено во Европа“ исклучиво на членките на ЕУ, а евентуално и да разговара за проширувањето од случај до случај.

Разговорите се одвиваат паралелно со преговорите меѓу ЕУ и Кина за намалување на трговскиот дефицит од една милијарда евра дневно.

Во исто време, во ЕУ се водат интензивни дискусии за текстот на индустрискиот закон, кој претседателката на Комисијата, Урсула фон дер Лајен, сака да биде усвоен до крајот на годината.

Договорот се бара додека Париз и Берлин се борат со можноста лидерката на крајната десница Марин Ле Пен да победи на претседателските избори во Франција следната година. Таквиот исход значително би ја комплицирал соработката на ниво на ЕУ.

Сепак, кампањата за француските претседателски избори, на кои Макрон не може да се кандидира, веројатно ќе спречи постигнување договор за буџетот за неколку месеци. Ле Пен, која води на анкетите, вети дека во случај на победа, драстично ќе ги намали придонесот на Франција во буџетот на ЕУ.

Кога беше прашана за француско-германските разговори, функционерката на Националното собрание Марин Ле Пен рече дека партијата ќе ја претстави својата визија за односите со Германија на есен, како дел од предизборната програма. Кандидатот на крајната левица Жан-Лук Меланшон објави на мрежата X дека сите договори меѓу Париз и Берлин би го обврзувале само Макрон, а не Франција или нејзиниот следен лидер.