ПРАТЕНИЦИТЕ ДА ГО СТОПИРААТ ПРЕДЛОГ ЗАКОНОТ ЗА ИГРИ НА СРЕЌА Здружението „Сакам да работам“ загрижено за работните места на 10.000 луѓе

Здружението на вработени во секторот игри на среќа „Сакам да работам“ очекува дека на утрешната седница на Собраниската комисија за финансирање и буџет, мнозинството пратеници од најголемите македонски политички партии ќе донесат одлука за стопирање на понатамошната процедура за усвојување на Предлог законот за игри на среќа и забавни игри.

Главен мотив е заштита на работните места на 10.000 луѓе, од кои најголемиот дел се етнички Македонци, кои веќе осум години живееме во грч, неизвесност, заедно со нашите семејства се тресеме дали ќе останеме на улица, со нецелосно исплатени кредити, со активирани хипотеки и со авионски карти за еден правец, иселување во странство.

Истовремено, нагласуваат од Здружението, мотив за пратениците треба да биде и избегнувањето на албанското сценарио да се преслика во Македонија. Спречување легалните објекти за игри на среќа да се заменат со играчници на црно по подруми, каде државата ќе нема контрола, а младите ќе станат лесна мета.

„Сметаме дека на Јавната расправа дадовме доволно издржани аргументи дека актуелниот Предлог закон за игри на среќа и забавни игри содржи толку нелогични одредби кои не можат да се поправат со амандмани. Уште еднаш ги повикуваме претставниците на Министерството за финансии и пратениците да не брзаат. Брзината не смее да биде поважна од суштината. Треба да се формира работна група составена од претставници на надлежните институции, вработените, асоцијациите, стопанските комори и уставни експерти кои во кус рок ќе изработат нова предлог регулатива која ќе биде реално спроведлива. Ние вработените сме прва линија за спроведување на постоечка регулатива, која е една од најстрогите во регионот и пошироко, и затоа поседуваме искуство, знаење и личен кредибилитет да предупредиме, но и да дадеме издржани предлози“, се наведува во реакцијата на Здружението Сакам да работам.

Оттаму порачуваат дека ако Министерството за финансии и пратениците останат глуви на нивните апели, подготвени се со сите демократски средства да го заштитат нивното уставно загарантирано право на работа.