МОБИЛНИ ТЕЛЕФОНИ НАЈДЕНИ ВО ЌЕЛИИ Откриени недозволени предмети во затворот „Шутка“

Мобилни телефони и други недозволени предмети биле пронајдени и одземени во Затворот Скопје, откако раководството на установата го пријавило случајот во полиција.

Како што информираат од СВР Скопје, на 7 февруари околу 13:30 часот било пријавено дека во една од просториите во казнено-поправната установа биле откриени предмети што не смеат да се поседуваат во затворски услови. По пријавата, полицијата излегла на терен и ги подигнала пронајдените предмети за понатамошна постапка.

За настанот бил известен и јавен обвинител, а истрагата е во тек. Засега не се соопштува како предметите завршиле во затворот, ниту кому му припаѓале.

Од полицијата велат дека се преземаат дополнителни мерки за целосно расчистување на случајот и утврдување на евентуална одговорност.