ВО ОВОЈ ГРАД СЕ ВОЗИ ПОБАВНО ОД ВЕЛОСИПЕД Возачите губат 136 часа годишно, 10 километри се минуваат за 35 минути
Годишниот индекс на сообраќај на „TomTom“ анализира податоци од корисници на сателитска навигација во 501 град во 62 земји на шест континенти.
Лондон третпат по ред е прогласен за најлош град во светот кога станува збор за сообраќајни метежи, покажуваат најновите податоци од глобалниот индекс на „TomTom“.
Просечната брзина на возилата во британскиот главен град изнесува само 16,5 километри на час, што значи дека секојдневното возење низ Лондон станува вистински предизвик за возачите.
Според извештајот на „TomTom“, холандска технолошка компанија специјализирана за навигациски системи, дигитални мапи и анализа на сообраќај, патување од околу 10 километри во Лондон трае во просек 35 минути и 7 секунди. Овие бројки уште еднаш го потврдуваат статусот на градот како место со најбавен сообраќај во светот, пишува „Daily Mail“.
Условите за возење се влошуваат
Годишниот индекс на сообраќај на „TomTom“ анализира податоци од корисници на сателитска навигација во 501 град во 62 земји на шест континенти.
При рангирањето на најлошите градови, особено оние со повеќе од осум милиони жители, се земаат предвид просечната брзина на движење, нивото на сообраќајни метежи, растојанието кое може да се помине за 15 минути, како и времето изгубено во сообраќај во шпицот.
Со милиони возила на улиците секој ден, состојбата во Лондон се влошува од година во година. Извештајот покажува дека просечното време на патување е зголемено за дополнителни 45 секунди во однос на минатата година, што значи дека еден возач губи дури 136 часа годишно заглавен во сообраќај.
Посебно се издвојува 10 септември 2025 година, кога е забележан најлошиот сообраќаен метеж. Голем штрајк во лондонското метро ги принудил граѓаните да бараат алтернативни начини на превоз, а до 17 часот нивото на метеж достигнало дури 135 проценти.
Средновековни улици и модерен сообраќај
Експертот за сообраќај во „TomTom“, Енди Мерчант, посочува дека ваквата позиција на Лондон јасно го отсликува притисокот врз градската инфраструктура.
„Голем дел од лондонските улици датираат од средниот век и биле проширени во времето на кралевите Џорџ. Тие едноставно не биле дизајнирани за обемот и разновидноста на сообраќајот што постои денес“, вели Мерчант.
Сепак, тој гледа и можност за подобрување. Во 20 лондонски општини треба да започнат тестирања на автономни возила, што би можело да им помогне на локалните власти и урбанистите поефикасно да управуваат со сообраќајот и да го намалат метежот.
Десет градови со најбавен сообраќај во светот:
Лондон (Обединето Кралство) – 16,5 км/ч
Бангалор (Индија) – 16,6 км/ч
Мексико Сити (Мексико) – 17,4 км/ч
Хајдерабад (Индија) – 18,4 км/ч
Богота (Колумбија) – 18,9 км/ч
Њујорк (САД) – 19 км/ч
Буенос Аирес (Аргентина) – 19 км/ч
Ченаи (Индија) – 19,2 км/ч
Париз (Франција) – 20 км/ч
Ахмедабад (Индија) – 20,7 км/ч
Кој град има најголем метеж?
Ако се гледа само просечното ниво на сообраќаен метеж, најлошо стои Мексико Сити со 75,9 проценти, по што следуваат Бангалор со 74,4 и Богота со 69,6 проценти.