ТРАМП ЗАСЛУЖУВА НОБЕЛОВА НАГРАДА Светските лидери го поздравуваат договорот за Газа

Светските лидери го поздравија мировниот договор меѓу Израел и Хамас, постигнат со посредство на претседателот на САД, Доналд Трамп, нарекувајќи го „историски чекор кон ставање крај на двегодишната војна во Газа“.

Генералниот секретар на Обединетите нации, Антонио Гутереш, ја поздрави објавата за договорот со кој се предвидува прекин на огнот, ослободување на заложниците и овозможување на хуманитарна помош за Газа.

– Ги повикувам сите страни целосно да го почитуваат договорот. Борбите мора еднаш засекогаш да престанат, а страдањето на цивилите мора да заврши, изјави Гутереш, додавајќи дека ОН ќе помогнат во спроведувањето и обновата на Газа.

Израелскиот претседател Исак Херцог ја пофали улогата на американскиот претседател Доналд Трамп во посредувањето за договорот меѓу Израел и палестинската милитантна група Хамас.

– Нема сомнеж дека тој ја заслужува Нобеловата награда за мир за ова, напиша Херцог на X.

– Овој договор ќе донесе моменти на неописливо олеснување за драгите семејства кои не спијат веќе 733 дена. Овој договор нуди шанса за обнова, за закрепнување и за отворање на нов хоризонт на надеж за нашиот регион. Ова е време да им оддадеме чест на хероите меѓу нас – на нашите синови и ќерки што храбро се бореа за да ги вратат заложниците дома; на ужалените семејства; на повредените – телесно и духовно; и на сите што платија неподнослива цена за овој историски и судбински момент, нагласи Херцог.

Британскиот премиер Кир Стармер оцени дека договорот претставува „момент на длабоко олеснување“ и повика на итно укинување на ограничувањата за хуманитарна помош.

– Ова е првиот чекор кон праведен и траен мир, рече Стармер, изразувајќи благодарност до Египет, Катар, Турција и САД за нивните дипломатски напори.

Аргентинскиот претседател Хавиер Милеи го нарече договорот историски и најави дека ќе го номинира Трамп за Нобелова награда за мир.

Канадскиот премиер Марк Карни изрази надеж дека заложниците наскоро ќе бидат ослободени, додека владата на Нов Зеланд оцени дека ова е „позитивен прв чекор кон завршување на страдањата“.

Јапонскиот министер Јошимаса Хајаши го нарече договорот „голем чекор“ кон решението за две држави, додека германската министерка за надворешни работи Аналена Бербок истакна дека договорот носи „зрак надеж по повеќе од 700 дена смрт и уништување.“

Во Тел Авив, семејствата на заложниците и нивните поддржувачи ја слават веста за договорот, извикувајќи „Нобелова награда за Трамп!“

Во интервју за Фокс Њуз, Трамп изјави дека Хамас „веројатно“ ќе почне со ослободување на заложниците в понеделник.

– Ова е повеќе од Газа — ова е чекор кон мир на Блискиот Исток, рече тој.

Според соопштението на катарското Министерство за надворешни работи, Израел и Хамас постигнале договор за механизмите за спроведување на првата фаза од мировниот план, која вклучува прекин на огнот, размена на заложници и затвореници, и влез на хуманитарна помош.

Во наредните денови, Хамас треба да ги ослободи сите 20 живи заложници во замена за палестински затвореници, додека израелската војска ќе почне со повлекување од поголемиот дел од Газа.

Израелскиот премиерот Бенјамин Нетанјаху порача дека „со Божја помош, сите заложници ќе бидат вратени дома“.

Трамп претходно соопшти дека Израел и милитантната палестинска организација Хамас се договориле за првата фаза од мировниот план за Газа.

– Ова значи дека сите заложници ќе бидат ослободени многу скоро, а Израел ќе ги повлече своите трупи до договорената линија како прв чекор кон силен, траен и вечен мир, напиша Трамп на својата платформа Трут Сошл.