ЛАКЕИТЕ ВО ОБВИНИТЕЛСТВОТО И ВО СУДСТВОТО ЌЕ БИДАТ РАЗРЕШЕНИ Ќе дојдат вистински обвинители и судии и ќе одговарате, им порача Мицкоски на СДСМ и на ДУИ

Нема големи кривични случаи само поради една причина, а тоа се малкумина лакеи кои ги има во обвинителството и во судството, рече денеска претседателот на ВМРО-ДПМНЕ, Христијан Мицкоски на митинг во Демир Капија.

– Морам да прокоментирам една изјава на претседателот на СДСМ. Тој кажа дека немам право да ги обвинувам СДСМ и ДУИ за судството и обвинителството, затоа што 15 месеци сме биле Влада и немало некои големи кривични случаи. Затоа чувствувам потреба да му одговорам – нема големи кривични случаи само поради една причина, а тоа се малкумина ваши лакеи кои ги има во обвинителството и во судството. Тие не дозволуваат вакви големи кривични пријави, иако истражните органи како МВР и останатите надлежни сработија десетици случаи на висока корупција од времето кога влада беа СДСМ и ДУИ – кажа Мицкоски.

Мицкоски додаде дека сега грчевито нивните лакеи заедно со нив се борат да се опструираат истрагите поткрепени со докази.

– Целта е да можат оние поранешни функционери од СДСМ и од ДУИ кои ја крчмеа, распродаваа, разнебитуваа Македонија да не одговараат. Но, имам лоша вест, локалните избори ќе завршат и вашите лакеи ќе бидат сменети и ќе дојдат вистински судии и обвинители и ќе одговарате. Обрачот се стега и нема бегање од одговорност. А сите ваши лакеи, добро што се малкумина, ќе бидат разрешени и ќе одговараат за попречување на правдата – вели Мицкоски.