ВО ЈУЛИ ДОМАЌИНСТВАТА ПОТРОШИЛЕ 227.525 МЕГАВАТИ СТРУЈА Загубите во дистрибутивната мрежа се повисоки од произведената енергија од сонце

Во јули производството на електрична енергија ја надмина потрошувачката на овој енергенс во земјава, покажуваат податоците на Државниот завод за статистика.

Според овие податоци,  вкупната бруто-произведена електрична енергија изнесува 458.478 MWh, што претставува 8,8 % повеќе од бруто-домашната потрошувачка на електрична енергија која изнесувала 421 489 МWh.  Повеќе од половина од потрошената струја или 227.525 МWh е на домаќинствата.

И овој месец термоелектраните произвеле најмногу струја 183.891 МWh. Следат комбинираните централи со 119 020 МWh и хидроелектраните  кои произвеле 80.293 МWh. Соларни електрични централи произвеле 47. 661 МWh., а ветерниците 24.006 МWh. Биогасни централи, пак произвеле 3.606 МWh.

Во јули се увезени 114.930 МWh, а извезени се 151.919 МWh.

Интересен е и податокот дека во овој месец дистрибутивните загуби изнесувале 54.551 МWh што е повеќе од  произведените количини на струја од сонце.

Во јули 2025 година, вкупната потрошувачка на природен гас  изнесувала  25.599 милиони nm3 што е за 13,9% помалку д истиот месец лани и е резултат на намалената активност на когенеративните постројки. Овој месец вкупно се потрошени 357. 665 тони јаглен кој главно бил за производство на електрична енергија.

Потрошувачката на нафтени продукти е зголемена за 14,1%.и таа изнесувала  и 112.946 тони.