14-ГОДИШНО ДЕВОЈЧЕ ИЗБОДЕНО ПРЕД УЧИЛИШТЕ ВО ВИЕНА Во тек е голема полициска потрага по напаѓачот
Инцидентот се случил напладне, а девојчето е итно префрлено во болница, соопштија австриските медиуми.
Виена денес беше потресена од веста дека 14-годишна ученичка е повредена во напад со остар предмет пред училиштето на улицата Карајангасе во населбата Бригитенау. Инцидентот се случил напладне, а девојчето е итно префрлено во болница. Според официјалните информации, нејзиниот живот не е во опасност.
Бројни полициски сили, вклучувајќи ја и специјалната единица и кучиња за помош, веднаш беа испратени на местото на настанот во австриската престолнина. Властите објавија дека нема опасност за граѓаните, ниту за учениците и наставниците кои биле во училиштето во времето на нападот.
Поради потрагата по напаѓачот, наставата беше прекината, а објектот беше ставен под строг надзор. Сепак, еден час по почетокот на полициската акција, сè уште нема траги од сторителот, ниту пак е познато со какво оружје е повредено девојчето.
Портпаролката на виенската полиција, Јулија Шик, потврди за австрискиот весник „Хојте“ дека ученичката е повредена од остар предмет, како и дека е во стабилна состојба и дека нејзиниот живот не е загрозен.