ДРВА ПАЃАА ВРЗ ВОЗИЛА И КУЌИ, ГОРЕА БАНДЕРИ Повеќе од 50 пријави за хаос по невремето во Скопје
Повеќе од педесет пријави за паднати дрва, искрење на кабли и оштетени возила – надлежните служби се уште интервенираат низ скопските улици.
Скопје синоќа беше парализирано од невремето проследено со силни ветрови и дожд, а на бројот за итни повици 112 беа евидентирани повеќе од педесет пријави. Граѓаните алармираа за паднати дрва, оштетени автомобили, скинати кабли на ЕВН, но и за ситуации кои претставувале директна закана за безбедноста на луѓето.
Во централното градско подрачје, едно дрво паднало врз возило кај АМСМ на улицата Теодосиј Гологанов, додека слични инциденти се случиле и на Никола Русински и Ѓорче Петров. Во неколку случаи дрвјата се срушиле директно врз приватни домови – во Топаана едно паднало врз куќа, а на улица Струма дрво оштетило балкон. На булевар Партизански одреди пак, целиот паркинг спроти слаткарницата Палма бил затрупан со гранки кои оштетиле повеќе возила.
Невремето не ги поштедило ниту јавните институции. Дрво се урнало врз дворот на градинката „Орце Николов“ и врз Драмскиот факултет, а на неколку други локации, меѓу кои и кај Министерството за труд и социјална политика, граѓаните пријавиле поголема штета. Во Старата чаршија, Капан-ан, паднало дрво кое привремено ја блокирало улицата, додека во повеќе делови од Аеродром и Карпош се пријавени дрва кои опасно се навалиле кон објекти и бандери.
Голем дел од пријавите се однесуваат на електричната мрежа. Во Козле горела бандера, на Шар Планина и во Маркова Сушица биле пријавени паднати кабли под напон, а во Илинден и Сопиште жиците искреле со ризик од поголем пожар. На булевар Босна и Херцеговина биле оштетени и семафори кои претставувале опасност за сообраќајот.
Не изостанаа и пријави за материјални оштетувања врз приватна сопственост – во Ѓорче и Бутел неколку кровови и тенди биле откорнати и претставувале ризик за минувачите, а во Лептокарија паднат кабел предизвикал дополнителен страв меѓу граѓаните.
Центарот за управување со кризи информира дека сите пријави се проследени до надлежните служби кои интервенираат по приоритет, додека пожарникарите, екипите на ЕВН и општинските служби остануваат на терен до целосно нормализирање на состојбата.
🎥 УЧИЛИШТЕТО И ГРАДИНКАТА ВО БУТЕЛ КУРТУЛИЈА ОД ПОЖАР Костовски се сомнева дека огнот бил подметнат
📷 ДРВО ПАДНА ВО КАПИШТЕЦ, ИСКРИ ОД ЖИЦИ ПРЕДИЗВИКУВААТ ПОЖАРИ Силно невреме го сардиса Скопје