ЛЕГЕНДАТА СЕ ВРАЌА КАКО ТРЕНЕР Иван Чупиќ ќе го води ракометниот клуб Вардар

Поранешниот хрватски репрезентативец и член на златната генерација на Вардар од 2017 и 2019, Иван Чупиќ, е нов тренер на Вардар 1961. Тој доаѓа на местото на Гиљермо Милано, а претходно работеше како тренер во Метковиќ.

– Вардар за мене е втор дом. Голем клуб, поголем од сите нас. Целта ми е да ја вратиме титулата таму каде што ѝ е местото – изјави Чупиќ, кој додаде дека е задоволен од засилувањата што ги договорил клубот претходно и дека нема потреба од нови имиња.

На прес-конференцијата, претседателот Михајло Михајловски откри дека постои неизвесност околу иднината на Стојанче Стоилов во стручниот штаб.

– Столе е легенда, но мислам дека моментално не е подготвен да го води тимот. Ќе разговараме со него за можни улоги во клубот – рече Михајловски.

Михајловски призна дека поразот од Пелистер му паднал тешко, но нагласи дека клубот создава конкурентен тим за следната сезона.

– Го освоивме Купот, имавме шанса за ЛШ. Поразот во Скопје ме погоди, но сега сум оптимист. Ќе атакуваме на титулата – додава директорот.

За изборот на Чупиќ рече дека уште како играч покажувал тренерски потенцијал и оти одлуката да му се даде шанса дошла по само еден разговор.

– Го прашав дали сака да биде тренер, рече „доаѓам одма“ – објасни Михајловски.