ЛЕВИЦА ГИ ОТФРЛА НАВОДИТЕ НА ВЛАСТА Купивме подрумски простории со кредит, не се работи за афера
Од Левица нагласуваат дека немаат никаква деловна соработка со банката што ги продала просториите, освен фактот што имотот бил под стечај две години пред да биде купен.
Партијата Левица остро ги демантира наводите на премиерот Христијан Мицкоски за наводни нерегуларности поврзани со купопродажбата на нејзините партиски простории. Според Левица, изјавите на Мицкоски се „паушални обвинувања“ чија цел е да се прикрие „катастрофалното работење“ на владата.
„Премиерот се обидува да направи сензација од непостоечка тема, мислејќи дека криминалот кој неговата партија го има воспоставено ќе се преслика и на другите политички субјекти. Ја информираме јавноста дека Левица преку хипотекарен кредит ги обезбеди своите први простории, кои се купени во руинирана состојба и се под залог“, велат од партијата.
Од Левица нагласуваат дека немаат никаква деловна соработка со банката што ги продала просториите, освен фактот што имотот бил под стечај две години пред да биде купен.
„Документите за купопродажба се јавно достапни во Катастарот на недвижности, иако премиерот на собраниската говорница се обидуваше да ги прикаже како службена тајна“, додаваат од партијата.
Од Левица исто така укажуваат дека поголема загриженост за јавноста треба да биде „вмешаноста на високи владини функционери во излевање на државни тајни кон картели преку своето обезбедување“, за што, како што наведуваат, допрва треба да се утврди одговорност.