ПЕКИНГ ПОБРЗА ДА ВОЗВРАТИ СО ИСТА JAЧИНА Наметна царини од 34% за САД
Кина воведе дополнителни царини од 34% за увоз на производи од САД. Стапката е еднаква на царините што ги наметнаа САД за увозот од Кина.
Кина денеска објави дека ќе воведе реципрочни царини од 34% на целиот увоз од Соединетите држави, почнувајќи од 10 април, јави Би-Би-Си.
Во средата, американскиот претседател Доналд Трамп објави дополнителна царина од 34 отсто за сите кинески увози во Соединетите држави, потег што може да предизвика сериозно преоценување на односите и да ескалира трговска војна меѓу двете најголеми економии во светот.
„Оваа американска практика не е во согласност со меѓународните трговски правила, сериозно ги поткопува легитимните права и интереси на Кина и претставува типичен пример на еднострано насилно однесување“, се вели во соопштението на Царинската комисија на Државниот совет на Кина, која ги објави контрамерките.
Како дел од реципрочните мерки објавени денеска, Кина додаде 11 американски компании на својата „листа на недоверливи субјекти“, вклучувајќи производители на дронови, и воведе извозни контроли за 16 американски компании, забранувајќи го извозот на кинески предмети со двојна употреба. Министерството за трговија исто така објави антидампинг истраги за увезени медицински ЦТ рендгенски цевки со потекло од САД и Индија.
Истовремено, портпарол на Министерството за трговија соопшти дека Кина поднела тужба до Светската трговска организација (СТО).
– Тарифите наметнати од САД сериозно ги прекршуваат правилата на СТО, ги оштетуваат легитимните права и интереси на членките на СТО и го поткопуваат мултилатералниот трговски систем заснован на правила, како и меѓународниот економски и трговски поредок – рече портпаролот.