КЕШИШЕВ ГИ ФРЛИЛ ЛОПАТИТЕ ВО ДОЛ СО КАПИНИ Тврди дека другите обвинети пред него не зборувале кој и зошто ќе биде грабнат

Денеска продолжи распитот на Влатко Кешишев, четвртообвинет за убиствата на Вања Ѓорчевска и на Панче Жежовски што се случија во ноември 2023 година.

Првообвинетиот Љупчо Палевски остана во судницата, никој не побара да биде отстранет.

За Кешишев немаа прашања Велибор Манев и неговиот адвокат Горан Бошевски.

Бојан Манев, адвокат на Боре Видевски го праша Кешишев од каде тргнале дента на убиството на Панче.

– Во Велес ги чекав паркиран со „кангуто“ кај пругата. Дојдоа по еден саат со „цитроенот“. Ставивме гориво во „кангуто“. Вељо дојде до мене во „кангуто“ и ми кажуваше од каде да возам, а позади нас во „цитроенот“ возеа Палчо и Боре. Покрај езерото тргнавме кон Рудник, јас се паркирав. Вељо излезе од „кангуто“ и тргна со нив со „цитроенот“ кон јамата. Ги чекав околу половина час. Потоа дојде Вељо, седна покрај мене во „кангуто“ и ми кажа каде да возам. Се исклучивме покрај самиот пункт за да излеземе на автопатот. Ми кажуваше каде да возам. Се приклучивме на стариот пат преку Катланово, а зад нас возеа на растојание Палчо и Боре. Имаа контакт со моторола. Стигнавме до првата населба Маџари и Палевски ни кажа да се паркираме на еден голем паркинг плац. Палчо и Боре стигнаа и се паркираа позади нас. Палчо ги избриша воланот и менувачот со WD-40, па влезе во „кангуто“. До него седна Вељо, а јас и Боре бевме позади во „кангуто“ и така стигнавме до штабот – раскажа Кешишев.

– На денот на убиството на Панче, кога влеговте во Велес каде се паркиравте? – праша адвокатот Манев.

– Ние не влеговме во Велес, скршнавме десно кон индустриската зона и по тој пат стигнавме до паркинг блиску до пругата – рече Кешишев.

– Во исказот кажавте дека после убиството на Вања вие ги фрлате лопатите. Може ли да појасните каде ги фрливте? – праша адвокатот.

– Откако излеговме од местото се приклучивме на асфалтот, на патот кон селото Бразда. По 500 метри Палчо ми рече да ги фрлам во еден дол со капини. Јас ги фрлив, мене ми рекоа – рече Кешишев.

– Дали пред убиството на Вања некогаш сте биле во обиколка на зградата каде таа живееше? – праша адвокатот Манев.

– Не сум бил, само првиот пат кога се проба и вториот пат кога се изврши, а претходно не сум бил во обиколка на зградата. Не знам дали останатите биле – рече Кешишев.

– Дали знаете колку влеза има зградата? – праша адвокатот Манев.

– 25. Од каде да знам? – рече Кешишев.

Со ова заврши испитувањето од адвокатот Бојан Манев, а неговиот клиент, обвинетиот Боре Видевски немаше прашања за Кешишев.

Адвокатот Владимир Туфегџиќ, бранител на Александар Ѓорчевски, го праша Кешишев, дали во негово присуство имало разговори за грабнување на други лица пред да се донесе одлука за грабнување на личноста од зградата во Скопје.

– Знаев, првиот пат кога ја ископавме дупката, дека ќе биде наменета за киднапирање луѓе. После тоа не разговарале, колку што се сеќавам, сѐ додека не се случи тоа со Панче во Велес. Да, слушав муабети, но не до крај, бидејќи не ме интересираше. Помина долго време, се правеа тие муабети, но немаше ништо. Јас не се вратив, но не го сфатив тоа здраво за готово додека не се случија тие работи што се случија – рече Кешишев.

– Откако го зедовте „цитроенот“ во Велес и се вративте во Скопје, каде и кога за прв пат слушнавте договарање за киднапирање на друга личност? – праша Туфегџиќ.

– Мислам дека тоа беше кога бевме првиот пат, кога немаше успех. После вториот пат, се случи тоа – рече Кешишев.

– Откако се вративте со „цитроенот“ од Велес, на 15.12.2023 година пред јавен обвинител, изјавивте, цитирам „По ден и пол, околу пладне, дојдоа Велибор и Боре, го донесоа ‘кангуто’ и тогаш се договараа за грабнување на женска личност, но не знам која.“ Дали е тоа точно? – праша Туфегџиќ.

На ова приговараше обвинителката Ана Стојковиќ-Димитровска, која рече дека таков доказ не бил изведен, но судијата го дозволи прашањето.

– Не се сеќавам точно, не лажам, не се сеќавам точно – рече Кешишев.

– Колку средби и состаноци имало во ваше присуство пред да се донесе одлука за грабнување на личноста од зградата во Скопје? – праша Туфегџиќ.

– Не знам точно, неколку пати, кога доаѓаше Велибор во станот се почнуваше таа тема. Не знам колку време траеле тие средби. Не бев до крај присутен и не ги слушав до крај. Не се правдам, не знам точно да одговорам – рече Кешишев.

– Дали на тие средби на кои сте биле присутен сте слушнале некој да спомне дека разговарал со татко на некоја личност што треба да се грабне? – праша Туфегџиќ.

– Не, првпат слушнав тука во судницата – рече Кешишев, кој додаде дека не мислел ништо за тие планови зашто не ги сфаќал сериозно, додека не се случиле.

– Дали, според планот што сте го слушнале, однапред се знаело од каде требало да се бараат пари за откуп на грабнатото лице од зградата во Скопје? – праша Туфегџиќ.

– Не знам, тоа беше договор меѓу нив. Да не ги напаѓам, да не се правдам, не знам – рече Кешишев.

– Дали сте знаеле дека има фотографија од конкретната личност што требало да биде грабната во Скопје?

– Не, прв пат ја видов сликата кога се вративме од настанот во штабот, отворив Фејсбук и ја видов сликата од детето. А дотогаш немав видено никаква слика – рече Кешишев.

– Кога и како за прв пат дознавте за таткото на детето? – праша Туфегџиќ.

– Кога го доведоа во притвор слушнав дека разговараат со таткото на детето? Никогаш не сум слушнал Палевски дека разговарал со Ѓорчевски. А и никогаш не сум го следел со кого разговара – рече Кешишев.

Тој рече дека дента кога била грабнате Вања никој од нив немал телефони, туку само три радиостаници. Рече дека сите телефони најверојатно биле во штабот на Десна.

– Дали слушнавте дека девојчето било по грешка грабнато? – праша Туфегџиќ.

– Не, јас бев околу 20 метри настрана, да гледам дали ќе наиде некој и немам слушнато разговор – рече Кешишев.

– Дали некој во ваше присуство пред убиството на детето се јавил на мајката или на таткото? – праша Туфегџиќ.

– Не знам, не сум чул и не сум видел – рече Кешишев.

– Дали после убиството на детето некој ги спомна мајката и таткото на детето – праша Туфегџиќ.

– Не, сите молчеа, молчев и јас – рече Кешишев.