ДИРЕКТОРИТЕ И БРАТОТ НА МАСК ПРОДАВААТ АКЦИИ ВО „ТЕСЛА“ Акциите на компанијата паднаа за 40% од почетокот на годината

Акциите на компанијата „Тесла“ паднаа за повеќе од 40% од почетокот на годината, бришејќи ги сите придобивки што ги имаше Тесла од реизборот на Трамп во ноември.

Пазарната вредност на Tesla падна за повеќе од 800 милијарди долари од декември. Бројките за продажба паднаа на клучните пазари низ светот. Перформансите на Tesla се намалени на речиси секој европски пазар. Дури и продажбата во Кина, еден од најсветлите пазари на компанијата, опаѓа.

Ова ја поттикна еден од првите инвеститори на Tesla да изјави дека  Илон Маск треба да се повлече од функцијата извршен директор на производителот на автомобили, освен ако не се откаже од својата нова работа во американската влада.

-Мислам дека на Тесла ѝ треба нов извршен директор и денес решив да почнам да го кажувам тоа. Време е некој да ја води Тесла. Бизнисот е запоставен предолго  –  изјави Рос Гербер.

Тој се пожали дека бизнисот е „апсолутно“ во криза и дека поради тоа продал значителен број акции во последните месеци.

Побарувачката за електрични автомобили се чини дека достигна врв на клучните западни пазари и покрај острите намалувања на цените за да се зголеми привлечноста во време на континуиран притисок врз потрошувачките буџети.

Дури и членови на одборот на директори на Тесла ги продаваат своите акции во компанијата на Маск, чија вредност продолжува да тоне на берзите.

Според ABC News, четворица високи членови на Tesla продале акции во вредност од над 100 милиони долари од почетокот на месецот, што сугерира дека и на упатените им е преку глава од раководството на компанијата на Маск.

И братот на Маск, Кимбал, минатиот месец продаде 75.000 акции во вредност од околу 27 милиони долари, открија документите на Комисијата за хартии од вредност во САД.

Долгогодишниот сојузник на Маск, Џејмс Мардок, продал акции во вредност од околу 13 милиони долари истиот ден кога Тесла го забележа најголемиот пад во еден ден од почетокот на пандемијата на коронавирус.

Главниот финансиски директор на Tesla, Ваибхав Танеја, исто така продаде акции во вкупна вредност од над 5 милиони долари во последните недели.

-Кога инсајдерите, вклучително и директорите, продаваат акции, тоа не е позитивен сигнал. Ова може да значи дека вредноста на Тесла била преценета – изјави за ABC професорот за финансии на Универзитетот во Флорида, Џеј Ритер.

Но, не сите се согласуваат дека извршните директори ја губат довербата. Ова може да биде знак дека луѓето на повисоки позиции бараат корекција на цената.

-Иако распродажбата не мора да значи дека извршниот директор или членот на одборот е негативен за изгледите на компанијата, тоа може да значи дека мислат дека акциите се фер или дури и преценети – изјави аналитичарот на Морнингстар Сет Голдстајн за ABC.

Тесла допрва треба да лансира роботакси услуга наречена Cybercab, која е најавена за претстојното лето и, според некои, може да го спаси падот на Тесла.