ГОЦЕ ТРАЈКОВСКИ САМ СЕ ПРЕДАЛ НА ПОЛИЦИЈАТА По бегството се појави сведокот во случајот за убиството на Вања Ѓорчевска
Инаку, како што е познато, Трајковски, кој активно соработувал со таткото на Вања во обидите да ја пронајдат, беше важен сведок во процесот.
Гоце Трајковски, кој беше осомничен за подметнување пожар во кафуле во Кисела Вода и истовремено сведок на истрагата за киднапирањето и убиството на Вања Ѓорчевска, сам се предаде на полицијата. Според информации до кои дојде Плусинфо, тој се појавил во полициската станица во Кисела Вода, откако по него беше распишана потерница.
Трајковски, кој активно соработувал со таткото на Вања во обидите да ја пронајдат, беше важен сведок во процесот. Тие заедно собирале докази и прегледувале видео-снимки, но Гоце не се појави на судењето закажано за 15 ноември 2024 година. Неговата мајка, Кираца Трајковска, тогаш изјави дека здравствени проблеми го спречиле да сведочи.
Меѓутоа, Обвинителството подоцна потврди дека Трајковски има статус и на осомничен во случајот со подметнувањето пожар. Според нивните податоци, на 13 ноември, тој со уште три лица запалил кафуле кое било лоцирано во станбена зграда во Кисела Вода. Истражните органи уште работат на овој случај.
Пред три дена во Кривичниот суд во Скопје продолжи судењето за грабнувањата и убиствата на 14-годишната Вања Ѓорчевска од Скопје и на 74-годишниот Панче Жежовски од Велес, за кои се обвинети Љупчо Палевски Палчо, Велибор Манев, Боре Видевски и Ванчо Кешишев како директни извршители, а таткото на Вања, Александар Ѓорчевски е обвинет за помагање во грабнувањето на неговата ќерка.
Судењето за убиствата на 14-годишната Вања Ѓорчевска и на Панче Жежовски продолжува во понеделник на 27 јануари.