📷 РЕШЕН АКУТЕН ПРОБЛЕМ СО ПРЕВОЗОТ ВО СКОПЈЕ Гориво има за 7 дена, доволно додека ЈСП потпише договор, вели Славески

Град Скопје и Владата успешно го решаваат акутниот проблем со јавниот превоз, обезбедувајќи стабилност во сообраќајот за сите граѓани на Скопје, изјави претседателот на Советот на Град Скопје, Трајко Славески.

По вчерашната итна седница на Советот на Град Скопје, во која беа разгледани проблемите со јавниот автобуски превоз, беше постигнато консензус за решавање на кризата со недостиг на гориво.

Славески посочи дека членовите на Совет од сите советнички групи биле на висината на задачата. Низ конструктивна двочасовна расправа укажаа на низата недостатоци во секојдневното работење на ЈСП Скопје во изминатиот период и проблемите со кои се соочува претпријатието во обезбедувањето на витална функција за граѓаните на Скопје и сите останати кои на дневна основа користат јавен автобуски превоз.

– Советниците ги поздравија напорите на Владата и Градот Скопје кои обезбедија позајмица од државните резерви за гориво, која ќе трае седум дена. Во меѓувреме, ЈСП ќе продолжи со нормално функционирање на јавниот превоз, додека се завршуваат процедурите за нов договор за снабдување со гориво – вели Славески.

Овој краткорочен план ќе овозможи јавниот превоз да продолжи со редовни линии, додека се работи на долгорочни решенија за стабилизација на функцијата на ЈСП.