ДВАЈЦА ПРИВЕДЕНИ ЗА ДИВО ГРАДЕЊЕ ЗАД ПОЛИКЛИНИКАТА БИТ-ПАЗАР Спасовски вели дека е одземена градежна машина и се спрема кривична
Две лица се приведени во врска со обидот за узурпација и диво градење зад поликлиниката Бит Пазар, соопшти денеска министерот за внатрешни работи Оливер Спасовски.
Случајот бил пријавен синоќа, по 19 часот, а полицијата веднаш реагирала. По наредба на јавен обвинител одеземена била градежната машина, а кривичната пријава против двете лица веќе се процесуира и ќе оди по брза постапка.
Министерот порача дека никој не смее да узурпира никакво земјиште и никаква сопственост, независно дали е приватна или државна.
– Има таков настан кој по 19 часот синоќа се случил. Тоа, би рекол, е обид за узурпација и градба. Никој не може да ја нарушува сопственоста, независно дали се работи за државна или приватна. Пријавено е во полиција, излезено е на лице место, приведени се две лица од Скопје и притоа е известен јавниот обвинител по чија наредба е одеземна градежната машина. Во текот на денешниот ден се процесуира кривичната пријава и ќе оди по брза постапка. Лицата ќе бидат изведени пред судија на претходна постапка – рече Спасовски, одговорајќи на новинарски прашања по дефилето „Јас внимавам и безбедно возам“.
Според него, очигледно е дека со рушење на дел од оградата, лицата сакале да узурпираат градежно земјиште.
– Затоа се покренува кривична постапка за две дела: узурпација и нелегална градба. Полицијата изреагира веднаш и одземена е градежната машина. Ова е силна порака од државата дека никој не смее да узурпира никакво земјиште и никаква сопственост. Ирелевантно кој е, кој сака нека биде, тоа не може да го прави и ќе сноси одговорност – потенцира Спасовски.
МВР соопшти дека на 12.05.2023 на подрачје на Бит-Пазар полициски службеници ги привеле Н.К.(44) и Ш.Д.(42), поради сомнение дека сториле кривични дела „узурпација“ и „бесправно градење’. Според пријавеното, во 19.45 часот во близина на Поликлиника Бит-Пазар тие тргнале дел од оградата на здравствената установа со намера да го узурпираат просторот и да изградат паркинг, за што немале добиено дозвола од Општина Чаир.
За случајот е известен Јавен обвинител и по негово целосно документирање ќе бидат поднесени соодветни поднесоци.
КОЈ ГРАДИ ВО ТЕМНО И НА ДИВО? Раскопано е околу поликлиниката Бит Пазар