ЕДЕН ПОЧИНАТ И ТЕШКО ПОВРЕДЕНО ДЕВОЈЧЕ Повторно млад возач учесник во сообраќајка со жртва
Со наредба на јавниот обвинител ќе бидат обезбедени и снимките од видеонадзорот на местото на несреќата преку системот „Безбеден град“ – информираат од скопското јавно обвинителство.
Нешто по полноќ кај ТЦ Лиса во Ново Лисиче се случила сообраќајна несреќа помеѓу две возила, во која животот го загубил едниот возач, а неговата малолетна ќерка била повредена, исто како и возачот на другиот автомобил.
– На 26.01.2022 во 00.05 часот било пријавено дека на крстосницата од бул. „Видое Смилески Бато“ со сервисна улица се случила сообраќајна несреќа меѓу патничко возило „рено“ управувано од Т.М.(21) од Скопје и патничко возило „фолксваген поло“, управувано од Д.Г.(48) од с. Стајковци, скопско, двете со скопски регистарски ознаки – велат од МВР.
На местото на несреќата починал Д.Г., а смрт констатирал лекар од Итна медицинска помош.
Со тешки телесни повреди се здобила малолетна сопатничка од возилото „фолксваген поло“, констатирани во Комплексот клиники „Мајка Тереза“, а возачот на автомобилот „рено“ се здобил со телесни повреди и откако му била укажана лекарска помош во Градската општата болница „Св. Наум Охридски“, по што тој е задржан во полициска станица.
Дежурен јавен обвинител од Основното јавно обвинителство Скопје изврши увид на местото на тешката сообраќајна несреќа.
– Во насока на утврдување на причините за несреќата, јавниот обвинител издаде наредба за обдукција на телото на починатиот, како и за вештачење на примероци од крв и урина од возачот на другиот автомобил со цел да се утврди евентуално присуство на алкохол или други недозволени средства. Со наредба на јавниот обвинител ќе бидат обезбедени и снимките од видеонадзорот на местото на несреќата преку системот „Безбеден град“ – информираат од скопското јавно обвинителство.