ЌЕ ГО ПОБЕДАМ ШИЛЕГОВ СО 30.000 ГЛАСОВИ РАЗЛИКА Данела Арсовска вели дека црната кампања ќе им се удри од глава на противкандидатите

Кога оваа кампања од кампања за локални избори противкандидатот ја направи црна кампања, наместо да им се каже на граѓаните што ќе прави за нив, се виде кој каков интерес има, рече независниот кандидат за градоначалник на Скопје, Данела Арсовска, поддржана од ВМРО-ДПМНЕ на гостување на телевизија Канал 5 во емисијата „Само вистина“.

Според неа, наместо за визии и идеи, се зборуваше за сè друго само не за тоа што треба, како за името, за бугарско државјанство.

– Од своето раѓање до денес јас моето име не го дадов, името ми е од името на дедо Дане. Од другата страна имате чоек кој сè што кажал излажал, затоа се што зборуваат за мене се манипулации и лаги. Јас знам само дека овие манипулации и лаги ќе се докажат. Од другата страна има луѓе во очај, а сега нив ќе ги победам со 30.000 гласови разлика – рече Арсовска додавајќи дека ќе ги тужи за сите кажувања, како и за она за бугарското државјанство.

Многу медиуми извадија многу информации, рече таа, и додаде дека ова го прават бидејќи премиерот Заев рекол дека ќе ја депонира оставката ако Петре Шилегов загуби на изборите.

– Знаеме зошто се толку големи нападите. Заев рече дека ако го загубат Скопје, тогаш тој ќе си поднесе оставка – рече Арсовска.

Говорејќи за најавените тужби, таа рече дека се подготвуваат предмети и оти таа не отстапува од тоа.

Арсовска говорејќи за салата Расадник рече „јас веќе поднесов тужба, јас сум била менаџер во многу претпријатија и секаде имало успех, оваа сала била во моето портфолио пред 20 години, а кажувањата се невистина за Расадник и за ова поднесов тужба“.