КОНДОВСКИ ВЕТУВА БРЗА РЕАЛИЗАЦИЈА НА ПРОЕКТИТЕ Тоа му е фах од раководењето на приватните фирми (ВИДЕО)

Kандидат од СДСМ за градоначалник на Битола Христо Кондовски најави досега невидена брзина на реализацијата на проектите кои ќе се најдат во неговата програма, а кои ги побарале битолчани. Тој најави дека 10 од проектите ќе бидат поголеми.

Она што досега фалело во управувањето со градот, според него била ефкасноста и брзината на работењето.

– Досега се имало добра намера, имало домаќинско работење, требало само да се изменаџира побрзо. Затоа сум овде пред вас и одговорно тврдам дека ќе се движам во таа насока. Се менаџирало, но сметаме дека може уште подобро да се менаџира – рече тој.

Кандидатот на СДСМ за градоначалник на Битола најави преструктуирање на јавните претпријатија.

–  Од аспект на ефикасност, на кос бенефит анализи, сето тоа ми е фах од раководење во приватните фирми и знам тоа да го направам – рече Кондовски.

Тој рече дека ќе води само позитивна кампања за време на предизборните активности.

– Само позитивна, не знам поинаку. И како приватник и како стопанственик не сум се занимавал многу со конкуренцијата, имаме доволно многу што да работиме пред нас и во кампањата и после тоа како градоначалник , нема потреба да се занимаваме со конкуренцијата. Она што можам да го кажам како апел е дека онај што ќе биде опонент, како градоначалник, го канам уште првиот ден на кафе за да си подадеме рака, еден фер-плеј за позитивна кампања. Мислам дека на битолчани им е смачено да слушаат кој колку не чини, треба да слушаат колку ќе работиме. Значи со едни конкурентски идеи и тоа јавно и гласно да го ветиме и да го исполниме – рече Кондовски.

ВИДЕО ТВ Тера Битола.