Николоски: ВМРО-ДПМНЕ победи во 12 општини во четворката, Заев не успеа да победи дома

Го повикувам Обвинителството и надлежните органи, да реагираат и да ги расчистат инцидентите затоа што го нарушија демократскиот процес на изразување на слободната волја на граѓаните, побара денеска Александар Николоски од ВМРО-ДПМНЕ.

– Би сакал да ви се заблагодарам на сите кои што излеговте на Парламентарните избори и со својот глас придонесовте во развојот на демократијата во Македонија. Особено би сакал да се заблагодарам на преку 75 илјади жители на четвртата Изборна Единица кои што го подржаа бројот 14 и гласаа за ВМРО-ДПМНЕ. Тоа е највисок резултат за ВМРО-ДПМНЕ од сите шест изборни единици. Јас сум благодарен за вашата поддршка, исто така ВМРО-ДПМНЕ е благодарно за вашата поддршка. Од вкупно 19 општини во четвртата Изборна Единица, ВМРО-ДПМНЕ победи во 12 општини, а во две општини беше нерешено – вели Николоски. 

Да го немаше масовниот поткуп и притисоците и уцените кои што се случија вели Николоски, ќе победевме и во останатите општини.

– За жал вчерашниот ден, како и целата кампања, беше пример како функционира власта на Зоран Заев, масовен поткуп, притисоци, уцени и закани. Двајца градоначалници од редовите на СДСМ беа фатени како вршат поткуп, а бројни други активисти и функционери на СДСМ го правеа истото. И покрај тоа, ВМРО-ДПМНЕ победи во 12 општини во четвртата изборна единица. Зоран Заев не успеа да победи дома, Зоран Заев не успеа да победи во четвртата изборна единица. И затоа со сите пријатели, со сите подржувачи во четвртата изборна единица ќе продолжиме да се бориме против криминалот и корупцијата во Македонија. Ќе продолжиме да се бориме за младите да ги зачуваме во Македонија, ќе продолжиме да се бориме за праведна цена на тутунот, ќе продолжиме да се бориме за праведна цена на земјоделските производи, ќе продолжиме да се бориме против зелената мафија и ќе продолжиме да се бориме за економската благосостојба на четворката. Заедно продолжуваме! – порача Николоски.