Мицкоски: Филипче и Комисијата за заразни болести да постапат како лекари, а не да бидат слуги на Заев

Јас сум сигурен дека, доколку Филипче и останатите одлучат да постапат како лекари и луѓе кои што навистина се грижат за здравјето на граѓаните и кои дале заклетва, немам дилема дека ставот ќе биде поразличен од оној на желбите на Зоран Заев, Радмила Шекеринска и ова раководство на СДСМ, порача лидерот на ВМРО-ДПМНЕ, Христијан Мицкоски на денешната прес конференција.

Тој ова го кажа како одговор на прашање во пресрет на состанокот на Комисијата за заштита од заразни болести, кој министерот Филипче го најави за утре и околу можноста за одржување на парламентарните избори.

– Но, доколку Филипче одлучи да биде слуга на желбите на Зоран Заев и Радмила Шекеринска, тогаш можам да ви го кажам веднаш резултатот од утрешната средба, а тоа е дека не постои никаква опасност, дека практично се е како што треба, дека блескаме и дека Македонија е во истата онаа состојба од пред пандемијата. Но, повторно апелирам и до луѓето кои што се дел од таа комисија и што се професори, лекари и кои што имаат положено заклетва дека приоритет ќе им биде здравјето на граѓаните, а не желбите на ова раководство на СДСМ предводено од Зоран Заев да донесат одлука и став онаков каков што е во интересот на здравјето на граѓаните и интересот на нашата држава – рече Мицкоски.

Лидерот на ВМРО-ДПМНЕ рече дека ќе ги почекаат ставовите на лидерската средба во вторник кај претседателот Стево Пендаровски и ќе излезат со коментар за одржување на избори.

– Да видиме какви ќе бидат проценките на Советот за безбедност, каков ќе биде ставот на претседателот Пендаровски, па потоа може да излеземе со коментар на самата лидерска средба која ќе се случи веќе во вторник – рече Мицкоски.