Го убиле обезбедувачот оти им кажал да носат маска во продавница

Тројца членови од едно семејство се обвинети за убиство на припадник на обезбедувањето на една продавница, кој им кажал дека треба да носат маска на лицето, објави Си-ен-ен.

Калвин Минерлин (43) починал во болницата во Флинт откако бил застрелан во главата во петокот.

Шармел и Лари Тиг и нивниот син се обвинети за убиство со умисла.

– Од сите показатели, Минерлин едноставно си ја извршувал својата работа според препораките од властите во врска со пандемијата од ковид-19 за заштита на вработените и на муштериите – рече окружниот обвинител Дејвид Лејтон.

Видео снимките го потврдуваат целиот инцидент.

Минерлин влегол во вербален дуел со Шармел откако ѝ кажал на нејзината ќерка дека ѝ треба маска. Ќерката ја напуштила продавницата, по што мајката почнала да вика по Минерлин, кој ѝ рекол да го напушти објектот и му рекол на продавачот да не ја услужува.

Снимката покажува дека веднаш потоа, жената заминала со возило, но се вратила по 20 минути. Нејзиниот сопруг и син влегле во продавницата, почнале да викаат по човекот од обезбедувањето и потоа го застрелале. Двајцата се во бегство, додека сопругата е во притвор.