Ангеловска: Податоците за отпуштени лица во периодов треба да ги гледаме потполни

Министерката за финансии Нина Ангеловска одговори на новинарското прашање дека во март откази добиле преку 20.000 граѓани, наспроти информациите од Агенцијата за вработување дека се отпуштени 1.900 лица.

– Сметам кога гледаме податоци да гледаме потполни. Многу е мала разликата да се репортира или соопштува податок на пример за одјави по основ М1 и М2 образец, без да се спореди прво со пријавите и да се спореди со истиот период од минатата година – рече Ангеловска.

Таа додаде дека доколку хипотетички сме имале одјавено 20.000 лица овој период, а имало пријавено 16.000 лица, тогаш се работи за нето-ефект кој што треба да биде погледнат од пријавени и одјавени лица. Ако истиот тој период биде спореден со периодот од минатата година, дефинитивно трендот е дека има забележано зголемено одјавување, односно намалување на бројот на пријавени лица.

– Ние мораме на оваа ситуација да и пристапиме со една доза на реалност. Дали е нормално да очекуваме дека ќе има одредени затворања на работни места. Одговорот е Да. Дали превземаме се тој ефект да биде минимизиран и тоа е апсолутно да. Тоа се прави на системски начин со одредени мерки се со цел да дојде до фазата на опоравување штом ќе дојде момент за тоа – рече министерката.