Во Словенија масовно тестирање за да се дознае вистински број на заразени со коронавирусот

Словенечката Влада објави дека дополнително ќе го интензивира тестирањето за коронавирусот бидејќи сака да добие реална слика за тоа колку граѓани се инфицирани.

Како што јави дописникот на МИА од Љубљана, дополнителните тестирања ќе се направат во сите региони на државата и ќе бидат опфатени сите старосни категории граѓани. При изборот на лицата кои ќе се тестираат нема да биде важно во каква здравствена состојба се.

Резултатите од овие масовни тестирања ќе бидат одлучувачки за динамиката на постепеното укинување на ограничувањата донесени поради епидемијата.

Инаку, Словенија и досега беше една од земјите со најголем број тестирања по глава на жител. Во земјата со два милиони граѓани се направени речиси 40.000 тестирања за коронавирусот.