ВОЗДУШНА ТРЕВОГА – НАТО КРЕНА БОРБЕНИ АВИОНИ НАД ЛЕТОНИЈА! Населението добило предупредувачка СМС-порака

Нова безбедносна тревога вечерва е активирана на источното крило на НАТО, откако летонските вооружени сили предупредија за можна закана во воздушниот простор над општината Краслава, непосредно до границите со Белорусија и Русија.

Жителите во погоденото подрачје добиле итно предупредување преку системот Cell Broadcast со порака да бидат подготвени и да ги следат понатамошните инструкции.

„Ве информираме дека може да постои закана во воздушниот простор на Летонија. Во овој момент не е потребно дополнително дејствување. Доколку ситуацијата се промени, ќе добиете известување за потребните мерки“, гласи предупредувањето од Националните вооружени сили.

Ситуацијата не останала само на предупредување до населението. Според летонскиот јавен сервис ЛСМ, по откривањето на можната воздушна закана биле активирани борбени авиони кои учествуваат во мисијата на НАТО за патролирање на воздушниот простор над балтичките држави.

Засега летонските власти не објавија што точно ја предизвикало тревогата. Нема официјална потврда дека во воздушниот простор навлегол руски дрон, авион или ракета, ниту дека е употребено оружје. Поради тоа, во оваа фаза не се тврди дека станува збор за руски напад.

Фактот дека НАТО ги активирал авионите, сепак, покажува дека предупредувањето било третирано како потенцијална воздушна закана, а не само како превентивна вежба.

Краслава се наоѓа во источна Летонија, во регионот Латгале, непосредно до Белорусија и недалеку од руската граница. Токму оваа област повеќепати годинава беше опфатена со воздушни предупредувања поради странски беспилотни летала.

Вечерашната тревога доаѓа само неколку дена откако летонското Министерство за одбрана објави дека дополнителни сојузнички авиони ќе бидат распоредени во земјата. Четири германски авиони Еурофајтер треба да пристигнат во базата Лиелварде кон крајот на септември, а дополнителна поддршка треба да обезбедат италијанските и турските воздухопловни сили.