СИПАНИЦИТЕ КАЈ ОВЦИТЕ ГИ МАСАКРИРААТ СТАДАТА Угинале повеќе од 10 илјади овци, се бара итна вакцинација

Болеста на сипаници кај овците предизвикува големи материјални штети и ја загрозува егзистенцијата на десетици сточари во земјава, алармира Здружението на сточари. Тие велат дека состојбата на терен е критична, додека реакцијата на надлежните институции засега е задоцнета.

Според претседателот на Здружението на сточари, Насер Џемаили, штетите веќе го зафатиле источниот дел од земјата, каде што над 100 сточари ги изгубиле своите стада.

Од друга страна, заменик-министерот за земјоделство, Албрим Хоџа вели дека бројот на активни жаришта е намален од 30 на 11. Тој вели дека од Турција се побарани 500 илјади дози вакцини, но процесот на вакцинација останува во мирување поради координацијата со Европската Унија и ризикот од блокирање на извозот на месо.

И покрај предупредувањата дека вакцинацијата може да доведе до забрана за извоз на месо, сточарите инсистираат таа да започне веднаш, бидејќи зачувувањето на стадата е нивен приоритет.

Исто така и Грција се соочува со една од најголемите сточарски кризи, каде што се потврдени илјадници жаришта од регионот Еврос на истокот до Пелопонез, што довело до уништување на повеќе од 400 илјади грла добиток.

За да се спречи ширењето на болеста во целиот блок, Европската комисија воведе строги рестриктивни зони во Грција, затворање на кланиците и забрана за движење на месо и млеко.

Оваа состојба служи како предупредување за соседните земји доследно да ги применуваат мерките за карантин и гранична контрола.