📽️ САКАЛ ДА ПУКА ВО ПОРАНЕШНАТА, НО ПИШТОЛОТ НЕ ИСПУКАЛ Хаос во ресторан, келнер спречи голема трагедија

Американскиот адвокат Метју Екстон (43) е осуден на 24 години затвор откако во ресторан во Толедо, Охајо, се обидел да ја убие својата поранешна сопруга.

Екстон вперил наполнет пиштол кон неа и се обидел да пука, но оружјето не реагирало бидејќи осигурувачот бил вклучен. Нападот го спречил келнер, кој го соборил Екстон на под пред тој да успее да го откочи пиштолот.

Инцидентот се случил на 11 април 2025 година во ресторанот „Сабира“. Поранешната сопруга на Екстон, Кејда Валоне, таму вечерала со своето семејство.

Според обвинителството, Екстон пиел во локал во близина. Кога ја забележал поранешната сопруга, влегол во „Сабира“ и испратил пијалак до нејзината маса.

Потоа си заминал, но набрзо се вратил со пиштол „Колт Дифендер“.

Тој ѝ пришол на масата, од непосредна близина го вперил пиштолот во Кејда Валоне и се обидел да пука. Пиштолот не реагирал бидејќи осигурувачот останал вклучен.

Екстон тогаш почнал да ракува со оружјето, обидувајќи се да го оспособи за пукање.

Во тој момент реагирал келнерот Трејси Кол Џуниор, кој се фрлил врз него и го соборил на подот.

Во совладувањето на напаѓачот помогнале и други гости во ресторанот, кои го задржале до доаѓањето на полицијата.

Во пиштолот имало еден куршум во цевката и уште седум куршуми во рамката.

Екстон на судењето признал дека го вперил пиштолот кон поранешната сопруга, но негирал дека имал намера да ја убие.

– Не се обидов да ја убијам мојата поранешна сопруга, ниту се обидов да ја повредам неа или нејзиното семејство. Го оставив осигурувачот вклучен, тоа беше мој избор – изјавил тој пред судот.

 

DUMB: Man tries to SHOOT his ex wife while she was dining with friends. But the weapon JAMMED. Waiters and onlookers tackled him to the ground and waited for law enforcement to arrive. pic.twitter.com/kZyRK7qHVo

— Knt Make This Sh** Up (@realKMTSU) September 20, 2026

Тој тврдел дека единствено сакал да ја исплаши за да го забрза процесот на продажба на нивната поранешна заедничка куќа.

Обвинителите ја отфрлиле ваквата одбрана, а снимката од безбедносните камери во ресторанот била клучен доказ во случајот.

Судијата Гери Кук го коментирал моментот од снимката на кој Екстон, откако пиштолот не опколил, почнува да ракува со оружјето.

– Тоа е најморничавиот момент. Тој е збунет затоа што пиштолот не пукнал и се обидува да го откочи – рекол судијата.

Поротата го прогласила Екстон за виновен за обид за убиство и по две точки од обвинението за тешко нападение.

Судијата му изрекол девет години затвор за обидот за убиство, пет години за тешкото нападение и дополнителни шест години поради употребата на огнено оружје.

Вкупната затворска казна изнесува 24 години.

Во случај на прекршување на затворските правила, казната може да му биде продолжена за дополнителни четири и пол години.