📽️ ГАТУЗО МОРАШЕ ДА СЕ ИЗВИНИ ПО ДЕБИТО Римјаните исфрлени од второлигаш среде „Олимпико“
Мантова славеше со 2:0 среде „Олимпико“ и го исфрли минатогодишниот финалист уште на првата пречка. Гатузо ја презеде целата одговорност за болниот старт на сезоната.
Италијанскиот фудбалски тренер и нов предводник на Лацио, Џенаро Гатузо, веројатно не можел да замисли полошо официјално деби на клупата на Лацио. Неговиот тим загуби со 0:2 од второлигашот Мантова среде „Олимпико“ и веднаш испадна од Купот на Италија. пишува „Football Italia“.
Ударот е уште поголем бидејќи Лацио минатата сезона стигна до финалето на натпреварувањето. Сега куп-приказната заврши уште во првиот натпревар.
Римјаните имале можности да го свртат мечот во своја корист. Матео Канчељери и Булаје Дија, сепак, не ги искористиле шансите.
Казната пристигнала во 75. минута. Франческо Руоко ја довел Мантова во водство, а Лацио потоа тргнал по израмнување.
Последниот удар дошол длабоко во судиското продолжение. Исмаел Кајацо погодил од контранапад за конечни 0:2 и сензационален пласман на Мантова понатаму.
Гатузо по натпреварот не барал оправдувања и ја презел одговорноста.
– Ова е тежок удар. Исправно е да застанам пред вас, но сега е време за тишина и работа. Преземам целосна одговорност. Знаевме дека нè очекува многу работа. Во моментов боли и мораме да се извинеме. Продолжуваме понатаму, а јас цврсто стојам зад овие момци кои даваат сè од себе – изјавил Гатузо.
Тој признал дека Лацио бил премногу пасивен и дека му дозволил на второлигашот да добие самодоверба.
– Мораме да напредуваме во многу сегменти. Ова боли, но мораме да останеме силни. Вистина е дека имавме прилики, но во првото полувреме не направивме ништо до крај. Бевме недоволно агресивни и им остававме премногу простор – додал Гатузо.
Италијанскиот тренер по елиминацијата го опишал поразот и како „удар во лице“.