БЕЗ АНГАЖМАН НА РОДИТЕЛИТЕ НЕМА СПРАВУВАЊЕ СО ВРСНИЧКОТО НАСИЛСТВО Според Јаневска во многу семејства недостасува посветеност кон децата

Врсничкото насилство може да запре само ако сите, и институциите и наставниците и целата заедница, се ангажираме со целосна сериозност, но, посебно важна е улогата на родителите, порача министерката за образование и наука Весна Јаневска на едукативниот панел за родители и старатели на ученици на тема врсничко насилство, што денеска се одржа во Домот на културата „11 Октомври“ во Гази Баба.

Недостасува поголема грижа и посветеност од многу семејства кон своите деца, додаде Јаневска, не од сите, но од многу семејства недостасува токму таа воспитна компонента, што е основа за здраво растење.

– Последниот случај на врсничко насилство покажа деца со недостиг на емпатија и со изобличени вредности. Едни се изживуваат врз дете, а други стојат настрана, снимаат и се забавуваат, наместо да му помогнат и да го заштитат. Ова насилство е аларм за целото општество. Тоа е плод на недостиг на воспитна врска меѓу родителите и децата. Без ангажирање на родителите, секоја иницијатива за справување со врсничко насилство е неефикасна – додаде Јаневска.

Министерката посочи дека токму затоа на национално ниво се иницирани директни средби со родителите на децата и со наставниците, каква што е денешната средба. Целта е отворено да се предочат проблемите, да се слушнат предизвиците со кои се соочуваат семејствата и училиштата, како и да се разменат идеи и иницијативи за заедничко делување против врсничкото насилство.

Јаневска најави одлучност во справување со, како што рее, злото што возрасните им го наметнуваат на децата и ригорозен системски одговор.

– Одговорност мора да има и за родителите. Разговарав со министерот за внатрешни работи, ќе следат санкции за сите инволвирани и за нивните родители. Најчест причинител на врсничко насилство е семејното насилство и занемарувањето на децата – истакна таа.

Во моментов, во собраниска процедура се законски измени кои предвидуваат парични казни за родителите и за старателите на децата за кои ќе се утврди дека извршиле врсничко насилство во училиште.

Министерството за образование и наука минатата година подготви и реализираше сет мерки за справување со врсничкото насилство. Со законски измени ги задолжи училиштата во годишните програми за работа да предвидат активности за промоција на добросостојба на учениците, заштита од насилство, од злоупотреба, спречување дискриминација, подобрување на комуникацијата и слично. Беа изработени прирачници за наставници за справување со врсничко физичко насилство во училишта и за пријавување на сајбер насилство. Стручните служби во училиштата беа зајакнати со ангажирање на кадар онаму каде недостигаше, и беа вратени дежурствата на наставниците за време на одморите во ходниците и во училишните дворови.

Како што информира МОН, средбите со родителите ќе продолжат, а продолжуваат и обуките за стручните соработници за препознавање на семејно насилство преку однесувањето на децата на училиште и за спречување на понатамошно трансформирање во врсничко насилство.

Досега се реализирани обуки за стручни соработници од 30-тина општини во Македонија, во соработка со Комората на психолози, МВР и со Министерството за социјална политика, информира МОН.