🎥 БЕШЕ НАЈМЛАДА ОСКАРОВКА ВО ИСТОРИЈАТА, НО ХЕРОИНОТ ЈА УНИШТИ Еве како изгледа денес Тејтум О’Нил
Тејтум О'Нил беше најмладата добитничка на натпреварувачки Оскар во историјата, но зад славата се криеја семејни трауми, зависност од дрога, кома и долга борба за закрепнување
Но зад сјајот на рефлекторите се криеше сосема поинаква приказна – приказна за детство обележано со занемарување, семејни трауми, зависност, неуспешен брак и долга борба за сопствениот идентитет.
Тејтум Беатрис О’Нил е родена на 5 ноември 1963 година во Лос Анџелес. Таа потекнува од актерско семејство и е ќерка на познатиот актер Рајан О’Нил и актерката Џоана Мур. Иако нејзините родители беа успешни во Холивуд, нивниот приватен живот бил далеку од идеален.
Се развеле кога Тејтум имала само три години, а таа и нејзиниот брат Грифин останале да живеат со мајката, која сè подлабоко тонела во алкохолизам и зависност од лекови.
Подоцна Тејтум ќе раскажува дека нејзиното детство било исполнето со хаос, несигурност и чувство дека нема возрасна личност која ќе ја заштити. Тврдела дека била сведок на проблемите на мајка ѝ со алкохол и дрога и дека уште како дете била изложена на ситуации што не можела ниту да ги разбере.
Откако старателството го презел Рајан О’Нил, животот не станал многу помирен. Во својата автобиографија „A Paper Life“ го опишала татко ѝ како емотивно студен и импулсивен човек, повеќе заинтересиран за сопствената кариера отколку за воспитувањето на децата. Рајан О’Нил ги негирал многу од нејзините тврдења.
Иронијата е што токму татко ѝ станал нејзин партнер во филмот што ѝ го променил животот. Во 1973 година режисерот Питер Богданович ја ангажирал за улогата на Ади Логинс во филмот „Paper Moon“. Хемијата меѓу таткото и ќерката била извонредна, а критичарите биле воодушевени од природноста на девојчето кое никогаш претходно не глумело на филм.
Веќе следната година таа освои Оскар за најдобра споредна актерка и влезе во историјата како најмладата добитничка на оваа престижна награда. Освен Оскарот, доби и Златен глобус за нова ѕвезда на годината.
Големиот успех ѝ донесе и огромна заработка. По Оскарот стана едно од најбараните детски имиња во Холивуд. За филмот „The Bad News Bears“ од 1976 година добила хонорар кој тогаш бил меѓу највисоките некогаш исплатени на детска актерка.
Во текот на седумдесеттите години низа успешни филмови ја претворија во миленичка на публиката, но зад камерите нејзиниот приватен живот станувал сè покомплициран.
За време на растењето чувствувала огромен притисок поради славата. Подоцна призна дека уште многу млада почнала да експериментира со алкохол и дрога, обидувајќи се да избега од емоционалните рани што ги носела од детството. Проблемите со зависност постепено станале сериозни и почнале да влијаат врз нејзината кариера.
Во средината на осумдесеттите започнала врска со легендарниот тенисер Џон Мекинро. Се венчале во 1986 година и добиле три деца – Кевин, Шон и Емили.
На почетокот изгледало дека конечно ја пронашла стабилноста што никогаш ја немала како дете, но бракот бил обележан со чести расправии, силен медиумски притисок и нејзини повремени враќања кон дрогата.
Се развеле во 1994 година, а неколку години подоцна Мекенро го добил старателството над децата откако нејзините проблеми со хероин повторно се влошиле.
По разводот повеќепати се обидувала да започне нов живот, но зависноста се покажала како противник што тешко се победува. Во 2004 година ја објавила автобиографијата во која без разубавување зборува за трауматичното детство, конфликтите со татко ѝ, зависноста и распадот на бракот.
Книгата предизвикала големо внимание затоа што отворила теми за кои во Холивуд долго време се молчело.
Четири години подоцна повторно се најде на насловните страници кога беше уапсена поради поседување кокаин во Менхетен. Тогаш призна дека и натаму се бори со зависноста и повторно замина на лекување.
Во меѓувреме се обидувала да го обнови односот со татко ѝ. По повеќе од две децении речиси целосен прекин на комуникацијата, двајцата повторно се зближиле, а процесот на помирување бил прикажан во телевизиската емисија „Рајан и Тејтум: О’Нилови“.
Но ниту помирувањето не ги избришало старите рани. По смртта на Рајан О’Нил во 2023 година беше откриено дека Тејтум не е вклучена во неговиот тестамент. Подоцна изјави дека ја прифатила таа одлука, иако ја повредила.
Нејзината најголема животна драма се случила за време на пандемијата. Во мај 2020 година се предозирала со комбинација од лекови на рецепт и опијати. Последиците биле катастрофални – претрпела мозочен удар, срцев застој и неколку епилептични напади, по што шест недели била во кома.
По будењето морала повторно да учи да зборува, да оди и да ги извршува најосновните секојдневни активности. Закрепнувањето траело со години, а таа јавно зборуваше дека рехабилитацијата е најтешката битка во нејзиниот живот.
Во последните години Тејтум О’Нил повеќе не се обидува да го врати статусот на голема филмска ѕвезда. Повремено се појавува во помали проекти, дава интервјуа и отворено зборува за важноста на лекувањето на зависностите и последиците од траумите од детството.