БАНДЕРАС ОТКРИ ЗОШТО Е БЛАГОДАРЕН ЗА СРЦЕВИОТ УДАР Три стента му го превртеле животот

Познатиот холивудски актер Антонио Бандерас вели дека срцевиот удар од 2017 година бил пресвртница која целосно му ги сменила приоритетите. Славниот актер престанал да пуши, се вратил во родната Шпанија и почнал поинаку да гледа на времето што го има.

Во интервју за „Пипл“, Бандерас отворено зборувал за искуството кое денес го опишува со неочекувани зборови.

– Мојот срцев удар беше најдоброто нешто што ми се случило во животот – изјавил актерот.

Бандерас го доживеал срцевиот удар во својот дом во Англија. Неговата партнерка Никол Кимпел брзо реагирала и му дала аспирин пред медицинската интервенција.

Актерот потоа бил итно опериран и му биле вградени три стента.

3 стента, па сосема нови приоритети

Здравствената криза го соочила Бандерас со минливоста на животот. Сфатил дека не сака времето да го троши на работи кои повеќе не му биле важни.

Една од првите големи промени била откажувањето од цигарите. По долгогодишниот живот и кариера во Лос Анџелес, решил и да се врати во Малага.

Таму денес води сопствен театар и има осум ресторани.

Искуството во угостителството било една од причините да прифати улога во биографскиот филм „Тони“. Филмот се занимава со раниот живот на готвачот и телевизиски автор Ентони Бордејн, а Бандерас го игра неговиот ментор.

Холивуд останал зад него, семејството дошло напред

Бандерас годините во Холивуд ги памети како возбудлив период. Сепак, вели дека отсекогаш чувствувал дека неговото место е во Шпанија.

Меѓу најважните работи денес го става семејството. Особено зборува за ќерката Стела и за децата на поранешната сопруга Мелани Грифит, меѓу кои е и актерката Дакота Џонсон.

Со пофални зборови зборувал и за Грифит, за која рекол дека била извонредна мајка.