АФЕРАТА НА ДИРЕКТОРОТ ЈА ЧИНЕШЕ „ЕНВИДИЈА“ 430 МИЛИЈАРДИ ДОЛАРИ Акциите на гигантот паднаа за речиси 10 отсто

Љубовната афера на извршниот директор на „Енвидија“, Џенсен Хуанг, со кинеската бизнисменка Алиса Хуанг, за која американските разузнавачки служби се сомневаат дека работела за Пекинг, предизвика сериозни потреси во технолошкиот гигант. Акциите на компанијата паднаа во два последователни трговски дена, а нејзината пазарна вредност се намали за околу 430 милијарди долари, објави Ројтерс.

Акциите на „Енвидија“ во вторникот паднаа за повеќе од шест отсто, по загубата од 4,3 проценти во понеделникот. Во текот на двата трговски дена компанијата изгуби околу 430 милијарди долари од пазарната вредност. Претходните процени на пазарот укажуваа дека загубата би можела да надмине 470 милијарди долари. Падот ѝ овозможи на „Мајкрософт“ привремено да ја престигне „Енвидија“ и да стане втора највредна компанија во светот.

Од компанијата порачаа дека засега немаат причина да веруваат дека биле компромитирани националната безбедност на САД или деловните тајни на „Енвидија“, но дека истрагата ќе ги разгледа сите достапни информации. Хуанг ја поддржува проверката и се обврзал целосно да соработува. Одборот, истовремено, изрази доверба во неговото раководење со компанијата.

И Федералното истражно биро (ФБИ) го разгледува случајот, односно проверува дали 63-годишниот Хуанг бил цел на странска разузнавачка операција. Американскиот претседател Доналд Трамп изјави дека Хуанг му рекол оти не знаел дека Алиса Хуанг наводно била поврзана со кинеските разузнавачки служби.

Случајот доби и судска димензија. Акционер поднесе колективна тужба против „Енвидија“ и Хуанг, обвинувајќи ги дека ги довеле инвеститорите во заблуда со тоа што не ги откриле неговите наводни врски со Алиса Хуанг и можните ризици за компанијата. Тужбата е поднесена во федерален суд во Калифорнија и бара отштета во име на акционерите, но обвиненијата допрва треба да бидат разгледани од судот.

Во меѓувреме, американски сенатори побараа дополнителни одговори од администрацијата и построги ограничувања за извозот на напредни чипови во Кина. Републиканскиот сенатор Кевин Крамер дури повика Хуанг да се повлече од функцијата извршен директор.

Самиот Хуанг им признал на вработените дека ѝ бил неверен на сопругата и дека со своите постапки ги повредил неа и нивните деца. Тој се извинил, но не открил детали за односот со Алиса Хуанг. Во истата порака ја потврдил својата посветеност на компанијата и ветил дека ќе соработува со истрагата.

Пекинг ги отфрли обвинувањата дека Алиса Хуанг била кинески разузнавачки агент, оценувајќи ги како неосновани. Така, аферата што првично изгледаше како приватен скандал прерасна во случај со потенцијални последици за една од најважните компании во глобалната трка за развој на вештачката интелигенција.