МИСТЕРИОЗЕН СИГНАЛ ОД ВСЕЛЕНАТА СЕ ПОВТОРУВА НА СЕКОИ 8 МИНУТИ Научниците конечно открија од каде доаѓа

Мистериозни радиосигнали што се повторуваат приближно на секои осум минути ги доведоа научниците до необичен ѕвезден систем, оддалечен повеќе од 5.000 светлосни години од Земјата. По детални набљудувања, астрономите утврдиле дека сигналите доаѓаат од околината на мртва ѕвезда што кружи околу друга, слична на нашето Сонце.

Откритието го објави Меѓународниот центар за истражување на радиоастрономијата (ICRAR), а резултатите се претставени во научното списание „Нејчр астрономи“.

Системот, означен како GPM J071507−114153, се состои од две ѕвезди што кружат една околу друга.

Првата е бело џуџе, исклучително густ остаток од ѕвезда што го завршила својот животен циклус.

Втората е ѕвезда од типот „G“, слична на Сонцето.

Белото џуџе се врти околу својата оска приближно на секои осум минути, создавајќи правилен ритам на радиоимпулси.

Научниците првпат откриле вакви сигнали од бело џуџе што кружи околу ѕвезда слична на Сонцето.

Претходно, слични појави главно биле забележувани кај системи со помали и постудени ѕвезди, познати како црвени џуџиња.

Новото откритие покажува дека ваквите необични сигнали можат да се појавуваат и во поинакви ѕвездени комбинации.

Истражувачите анализирале повеќе од 100 часа радиоподатоци за да го следат движењето на белото џуџе.

За првпат сигналите биле доволно јасни за научниците да го забележат неговото орбитално движење.

– Ова е првпат импулсите да бидат доволно јасни за да го видиме движењето на белото џуџе во орбитата околу неговиот придружник. Затоа знаеме дека пулсирањата доаѓаат од регион блиску до белото џуџе, а можеби дури и од самото бело џуџе – објасни водечкиот автор на истражувањето, д-р Сем МекСвини.

Тимот го открил системот со радиотелескопот „Мурчисон Вајдфилд Ареј“ во Австралија, при истражување на Млечниот Пат.

Потоа, со помош на радиотелескопот „МирКАТ“ во Јужна Африка, ја утврдиле неговата прецизна положба.

Опсерваторијата „Кек“ на Хаваите дополнително потврдила дека во системот има ѕвезда слична на Сонцето.

Научниците утврдиле и дека двете ѕвезди прават целосен круг една околу друга за приближно 1,3 дена.

Додека го истражувале потеклото на импулсите, астрономите забележале и необична активност на поголемата ѕвезда.

Радиобрановите од белото џуџе минувале низ региони со силни магнетни полиња, овозможувајќи откривање далечни ѕвездени бури.

Станува збор за појави поврзани со магнетната активност на ѕвездите, слични на процесите што придонесуваат за создавање поларни светлини на Земјата.

– Како дополнително откритие, видовме како белото џуџе минува зад регион  со силно магнетно поле, најверојатно ѕвездена протуберанца, односно голема јамка од плазма што избива од површината на ѕвездата – изјави коавторката на истражувањето, вонредната професорка Наташа Харли-Вокер.

Таа истакна дека ваквите набљудувања отвораат нови можности за проучување на далечните ѕвезди.

– Неверојатно е што со користење радиобранови можеме да откриеме бури на ѕвезда оддалечена повеќе од 5.000 светлосни години – рече Харли-Вокер.

Овој ѕвезден систем припаѓа на ретка група астрономски објекти наречени долгопериодни транзиенти.

Тие емитуваат радиосигнали во интервали што можат да траат од неколку минути до неколку часа.

Откако истиот истражувачки тим го открил првиот ваков објект во 2021 година, астрономите идентификувале само околу десетина слични извори.

Нивното однесување сè уште не е целосно разјаснето.

Новото откритие им овозможува на научниците подобро да ја истражуваат врската меѓу магнетните полиња, ротацијата на белите џуџиња и радиоимпулсите што ги испуштаат.