ПУТИН ЈА ПУШТА ЕВРОПА НА ПРЕГОВАРАЧКАТА МАСА, НО ИМА УСЛОВ Виткоф даде свое толкување на изјавите на рускиот лидер

Рускиот претседател Владимир Путин се согласил европските претставници да се приклучат на следната рунда мировни преговори за Украина, соопшти американскиот специјален претставник Стив Виткоф по средбата во Кремљ.

– Европејците ќе се приклучат на следниот состанок, кој го сметаме за многу важен момент бидејќи тие се наши партнери и за нас е важно да учествуваат – изјави Виткоф за руската државна телевизија.

Американскиот претставник ја даде изјавата по разговорите со Путин, на кои присуствуваше и Џаред Кушнер, зетот на американскиот претседател Доналд Трамп.

Oд друга страна, Путин во изјава по средбите во Москва постави политички услов за обновување на дијалогот, барајќи од европските држави да го преиспитаат својот пристап кон војната.

За време на средбата, Кушнер му кажал на Путин дека Вашингтон забележал „голема промена“ во европските позиции.

Според него, американската администрација верува дека вклучувањето на европските претставници нема да го забави мировниот процес.

Путин потврдил дека Москва не се противи на дијалог со Европа, но истовремено упатил остри критики кон европските влади.

– Што се однесува до Европејците, ние никогаш не сме биле против вклучување во дијалог со Европа и никогаш не сме го прекинале тој дијалог. Тие беа тие што го прекинаа дијалогот со Руската Федерација – изјави Путин.

Рускиот претседател побара Вашингтон да разговара со своите европски сојузници за нивната улога во мировниот процес.

– Би сакале вие, господа, и американската администрација како целина, да соработувате со вашите европски сојузници за конечно да можат да одлучат што сакаат: мир или војна во Украина – порача Путин.

Кремљ не го потврди договорот

И покрај најавата на Виткоф, помошникот на рускиот претседател Јуриј Ушаков не потврди дека Европејците ќе учествуваат на следната рунда преговори.

Тој оцени дека сегашната европска позиција за Украина претставува „рецепт за бескрајна војна“.

Путин особено се спротивстави на европските предлози за распоредување западни војници во Украина по евентуалното постигнување мировен договор.

Според него, таквото присуство би ја загрозило безбедноста на Русија и би можело да предизвика продолжување на војната.

Овие разлики покажуваат дека согласноста за европско учество, за која зборува Виткоф, сè уште не значи договор за улогата на Европа во идниот мировен процес.

Зеленски ја поздрави најавата

По разговорите во Москва, Виткоф и Кушнер отпатуваа во Ирска, каде што се сретнаа со украинскиот претседател Володимир Зеленски.

Тој ја поздрави можноста европските претставници да учествуваат во следната рунда преговори.

Зеленски изрази надеж дека разговорите ќе опфатат конкретни чекори кон прекин на огнот и намалување на воените дејства.

– Важно е сè да се деблокира – изјави украинскиот претседател.

Тој потврди дека со американските претставници разговарале за подготовка на нова преговарачка агенда.

– Одлучивме дека ќе работиме на агенда за каков било вид деескалација, некаков вид прекин на огнот. Се надевам дека ќе имаме таква агенда – рече Зеленски.

Средбите следуваат по дводневните трилатерални разговори во Абу Даби, првите директни преговори меѓу Русија и Украина со американско посредство по девет месеци.

Двете страни пријавија одреден напредок, но територијалните прашања остануваат главната пречка.

Донбас останува болна точка

Русија контролира приближно една петтина од украинската територија, додека Киев одбива да го отстапи преостанатиот дел од Донбас.

Путин не покажа подготвеност да ги ублажи територијалните барања на Москва.

Тој повтори дека единствената прифатлива линија на разграничување со Украина е она што Русија го смета за своја државна граница.

Таквата позиција ги опфаќа и четирите украински региони за кои Москва во 2022 година прогласи анексија, иако не ги контролира целосно.

За време на средбата со американските претставници, Путин предложи и заедничка руско-украинска хуманитарна мисија во Костјантинивка.

Рускиот претседател тврди дека Москва го контролира градот, додека Украина претходно го оспори тоа тврдење.

Путин изјави дека на руските сили им се потребни пет дена за расчистување на мините во близина на градот, каде што, според него, останале меѓу 400 и 500 жители.

Американските претставници ја поздравиле иницијативата и најавиле дополнителни контакти со Москва, соопшти Ушаков.