ЕВРОПСКИТЕ ПИЛОТИ СЕ УМОРНИ, А ТОА Е ЗНАЧАЕН БЕЗБЕДНОСЕН РИЗИК Мнозинството доживеале микросон за време на лет
Во студијата во која учестувале 7.200 пилоти, 76,8%, изјавиле дека доживеале микросон барем еднаш за време на летот во последните четири недели, а 36,8% од испитаниците изјавиле дека немале доволно време за одмор за да спречат зголемен замор.
Заморот кај пилотите претставува значаен безбедносен ризик за европската авијација, соопшти германскиот синдикат на пилоти Vereinigung Cockpit (ВЦ), повикувајќи се на неодамнешна студија.
Во студијата, тројца од четири пилоти, 76,8%, изјавиле дека доживеале микросон (кратка епизода на губење на свеста што трае неколку секунди) барем еднаш за време на летот во последните четири недели. Понатаму, 36,8% од испитаниците изјавиле дека немале доволно време за одмор за да спречат зголемен замор.
– Студијата, спроведена за Европската асоцијација на пилоти од консултантската компанија Baines Simmons, е значајна поради големиот број учесници. Учествувале 7.200 пилоти. Пилотите се многу загрижени за проблемот со заморот и гледаат итна потреба од дејствување – вели Ања Гранвогл, членка на одборот на ВЦ, одговорна за безбедноста.
Студијата, исто така, откри значителни празнини во културата на пријавување знаци на замор што влијаат на безбедноста.
Само 37,2% од учесниците рекле дека пријавуваат дека се неспособни за летање кога се чувствуваат уморни. Речиси една четвртина, или 24,2% од испитаниците, рекле дека продолжиле да летаат и покрај заморот, без да го пријават, од страв од санкции или одмазда од менаџментот.
Синдикатот ВЦ повика на акција како одговор на овие наоди, кои се слични на резултатите од претходната студија спроведена пред 3 години.
– Безбедноста на летот не смее да зависи од економските притисоци со кои се соочуваат авиокомпаниите, ниту од храброста на поединечните пилоти. Авиокомпаниите мора да ги исполнат своите обврски, а регулаторите мора построго да го следат спроведувањето на постојните прописи и да ги затворат сите законски дупки – нагласи Гранвогл.