ГО НАШЛЕ МРТОВ ВО ИЗГОРЕН КАМИОН КАЈ ЛЕСКОВАЦ Возач од Македонија излетал на автопатот
Кабината целосно изгорела, а во неа спасувачите го пронашле безживотното тело на македонскиот државјанин М.Ј.
Македонски возач загина во тешка сообраќајна несреќа кај Лесковац во Србија, откако неговиот камион излетал од автопатот, се превртел и бил зафатен од силен пожар. Огнот целосно ја уништил кабината во која пожарникарите подоцна го пронашле неговото безживотно тело.
Несреќата се случила околу 1:50 часот по полноќ на автопатот Врање – Ниш, во близина на Богојевце. Загинатиот е македонски државјанин со иницијали М.Ј.
Според првичните информации објавени од српските медиуми, тој управувал со тешко товарно возило со приколка кога изгубил контрола, излетал од коловозот и се превртел.
Набргу потоа избувнал пожар кој брзо го зафатил камионот. На местото пристигнале пожарникари, Брза помош и полиција, но кабината веќе била целосно изгорена.
При пребарувањето пожарникарите го пронашле телото на возачот во кабината.
Полициската управа во Лесковац ја потврди несреќата, а полицијата извршила увид. Причината за излетувањето допрва треба да биде утврдена, иако во првичните медиумски информации се споменува неприлагодена брзина.
Сообраќајот на овој дел од автопатот по завршувањето на увидот бил нормализиран.