КЛИЧКО БАРА ПРИВРЕМЕНО СТАРАТЕЛСТВО НАД НАСЛЕДСТВОТО НА ЌЕРКА МУ Хајден Панетиер не оставила тестамент, 11-годишната Каја е единствен наследник

Владимир Кличко поднел итно барање до судот во Лос Анџелес да биде назначен за привремен старател на имотот на неговата 11-годишна ќерка Каја, која е единствениот наследник на Хајден Панетиер. Барањето е поднесено на 24 септември, а Кличко сака да добие законско овластување да го штити имотот што Каја треба да го наследи од мајка си.

Кличко со години ја има грижата за ќерката, која живее со него надвор од САД. Барањето се однесува на имотот на малолетната наследничка и на можноста тој да постапува во нејзино име додека трае оставинската постапка.

Според судските документи, Хајден починала без тестамент, па Каја е единствениот наследник на нејзиниот имот. Кличко тврди дека е итно да се назначи лице кое ќе го штити наследството бидејќи постои ризик дел од имотот да биде изгубен, оштетен или присвоен пред да биде назначен постојан претставник на оставината.

Во барањето има и неколку вознемирувачки детали. Кличко тврди дека дел од накитот и други лични предмети на Хајден исчезнале или не може да се утврди каде се. Дел од имотот, пак, во моментов е кај истражните органи. Според неговите наводи, федерални агенти влегле во домот на актерката во Лос Анџелес како дел од истрагата по нејзината смрт и однеле дел од предметите.

Тој во документите наведува дека уште пред смртта Хајден и тој ангажирале служба за обезбедување на нејзиниот дом, поради загриженост дека неименувано лице добило неовластен пристап до имотот. По нејзината смрт биле сменети бравите, а складишта со дизајнерска облека и модни додатоци што Хајден ги носела на јавни настапи биле преместени како мерка на претпазливост.

Кличко во поднесокот изнесува и тврдење дека лица кои не биле членови на семејството, а претходно биле поврзани со Хајден, пристапиле до нејзините електронски пораки и дел од нив биле избришани. Ова се наводи содржани во неговото судско барање.

Негова цел е да добие овластување да го преземе управувањето со имотот на Каја, да учествува во оставинската постапка и да помогне во зачувувањето на имотот на Хајден додека не биде назначен постојан администратор. Во документите се наведува дека назначувањето е „итно и суштински важно“ за заштита на интересите на Каја.

Хајден Панетиер почина на 16 август на 36 години. Таа и Кличко ја добија Каја во 2014 година. Кличко и Панетиер беа во врска од 2009 година, се свршија во 2013 година, а нивната врска заврши во 2018 година. Каја поголемиот дел од животот го поминала со својот татко.

Рочиште за барањето е закажано за декември.