📽️ ОТКРИЕН НОВ ВИД МАЧКА, ЛОЗАТА Е СТАРА 1,4 МИЛИОН ГОДИНИ Можеби веќе е загрозен вид

Изгледа како мала домашна мачка, тежи само 1,4 килограм, а приказната за неа почнала со човек кој нашол маче покрај пат и го однел дома. Дури години подоцна научниците сфатиле дека пред себе имаат нешто што науката дотогаш не го познавала.

Дивата мачка од облачните шуми Јунгас во Боливија е идентификувана како посебен вид – Leopardus tilcayo. Ова е првиот нов жив вид од семејството мачки што е формално именуван и опишан по повеќе од 100 години.

Од семеен дом до научно откритие

Тилкајо е долга околу 46 сантиметри и е помала од просечната домашна мачка. Има светлокафеаво крзно со неправилни дамки, а живее во влажните планински шуми во Боливија, кои често се покриени со облаци.

Но, особено необична е приказната за еден од само двата живи примерока што научниците досега ги проучиле.

Како мало маче бил пронајден покрај пат во близина на шума. Човекот што го нашол мислел дека станува збор за домашна мачка и го однел дома. Подоцна животното завршило во засолништето за диви животни „Сенда Верде“, а денес 10-годишниот мажјак е референтен примерок на новоопишаниот вид.

Нешто, сепак, не се вклопувало.

Кога истражувачите го споредиле животното со описите на познатите јужноамерикански тигрести мачки, неговите карактеристики не се совпаѓале. Првичното прашање дури не било дали откриле нов вид, туку дали некој веќе познат вид живее и во Боливија.

Одговорот го дала ДНК.

 

New cat alert! A call from a wildlife sanctuary about a “weird cat” has led to the first new cat species discovered in over 100 years in Bolivia’s Yungas forest ecoregion. Learn more about this feline surprise: https://t.co/crffXvPqH4 pic.twitter.com/USo7rI3Y5q

— National Geographic (@NatGeo) September 17, 2026

Тајната била стара 1,4 милиони години

Научниците анализирале генетски материјал од 38 мачки од повеќе земји во Јужна Америка, вклучувајќи и 8 музејски примероци.

Резултатот целосно ја променил сликата. Животните што долго време биле групирани како тигрести мачки всушност припаѓаат на 5 генетски различни вида.

– Никогаш не очекувавме оваа боливиска тигреста мачка да биде посебен вид – рече еволутивниот биолог Јонас Лескроарт од Универзитетот во Антверпен.

Генетската анализа покажала уште нешто: лозата на тилкајо се одвоила од другите сродни мачки пред околу 1,4 милиони години.

А науката досега имала изненадувачки малку информации за животното. Истражувачите располагаат со само два живи примерока и мал број снимки од камери поставени во природата.

Остатоците од мали глодачи пронајдени во изметот укажуваат дека тие веројатно се дел од неговата исхрана, додека снимките сугерираат дека мачката е поактивна ноќе.

Откриена, а можеби веќе загрозена

Откритието веднаш отвори и помалку романтично прашање – колку тилкајо воопшто останале во природата.

Јунгас е еден од загрозените екосистеми во регионот. Шумите се под притисок од сечење, ширење на земјоделството, пожари предизвикани од човекот и рударството.

Досега тигрестите мачки биле проценувани во пошироки групи, но истражувачите ги доставиле новите податоци до Меѓународната унија за зачувување на природата. Петте генетски линии сега треба да бидат разгледувани одделно.

Тоа значи дека тилкајо, практично веднаш откако науката официјално ја препозна, може да добие и процена дека е загрозен вид.