ПОЛСКИ ПАРАГЛАЈДЕРИСТ СЛЕТАЛ КАЈ СТРОВИЈА, ГО НАШЛЕ НА ДАУТИЦА Полицијата го пронашла по неколку часа

Полски параглајдерист бил пронајден во добра здравствена состојба на непристапен терен на планината Даутица, откако претходно пријавил дека слетал на непозната локација над селото Стровија, информира Министерството за внатрешни работи.

Според информациите од МВР, на 16 август во 20:30 часот во СВР Битола, 35-годишниот А.С.С. од Полска пријавил дека слетал на непознат терен над Стровија.

Тој на полицијата ѝ кажал дека по слетувањето долго пешачел и дека е изморен, но дека не е повреден.

По пријавата, полициски екипи започнале потрага по параглајдеристот. На 17 август, околу 3 часот по полноќ, полициски службеници од Полициското одделение Ропотови и од Полициската станица Прилеп го пронашле на непристапен терен на планината Даутица.

За среќа, параглајдеристот бил во добра здравствена состојба. По пронаоѓањето, тој бил пренесен до местото каде што престојувал.

Од МВР не соопштуваат дополнителни детали за причините поради кои параглајдеристот слетал на непознатиот терен.