БРИТАНСКА ТИКТОКЕРКА ОБВИНЕТА ЗА УБИСТВО ВО ДУБАИ, Ѝ СЕ ЗАКАНУВА СМРТНА КАЗНА Се брани дека дејствувала во самоодбрана

Британската инфлуенсерка и тиктокерка Брук Џорџ (23) е обвинета за убиството на 26-годишниот Британец Бил Триби во Дубаи, а доколку биде прогласена за виновна, според законите на Обединетите Арапски Емирати може да се соочи и со смртна казна со стрелање. Случајот предизвика големо внимание во британските медиуми, бидејќи младата жена тврди дека го усмртила мажот додека се бранела од насилен напад.

Според досегашните информации, Џорџ и Триби се запознале преку Фејсбук и двапати заедно отпатувале во Дубаи. Таа тврди дека за време на второто патување неговото однесување драстично се променило – станал контролирачки и агресивен, ѝ го задржал пасошот и ѝ резервирал само билет во еден правец, поради што стравувала дека не може да се врати дома.

Ноќта пред трагедијата, по излегување во бар, Брук Џорџ вели дека била физички нападната и повеќепати удрена. Кога се вратила во станот за да си го земе пасошот, повторно дошло до насилство. Таа тврди дека во страв за сопствениот живот зграпчила кујнски нож и го прободела Триби, по што била уапсена на аеродромот во Дубаи и обвинета за убиство.

Организацијата „Detained in Dubai“, која обезбедува правна и јавна поддршка за странци во Обединетите Арапски Емирати, смета дека случајот мора да се третира како можно семејно насилство и самоодбрана. Нејзиното семејство тврди дека Брук била видно повредена и преплашена по инцидентот, а организацијата бара таа да добие фер судење, адвокатска помош и привремено ослободување со кауција додека трае истрагата. Смртната казна и понатаму е предвидена во законодавството на Обединетите Арапски Емирати за одредени тешки кривични дела, меѓу кои и убиство со умисла.

Иако ваквите казни ретко се извршуваат и честопати се заменуваат со долготрајни затворски казни, можноста за изрекување смртна пресуда останува реална. Во случајот со Брук Џорџ, судот допрва ќе треба да утврди дали навистина станува збор за самоодбрана или за убиство.