СЕМЕЈНО НАСИЛСТВО ВО ПОВЕЌЕ ГРАДОВИ Четворица приведени, пронајдено и оружје
Во последното деноноќие МВР регистрирало 7 случаи на семејно насилство додека 4 лица биле лишени од слобода. Дел од пријавите вклучуваат физички напади, закани со оружје и прекршување судски мерки.
Седум случаи на семејно насилство биле пријавени во изминатото деноноќие, информираше полицијата. Четири лица завршиле во полициска станица, а со две лица бил извршен службен разговор, соопшти Министерството за внатрешни работи.
Инцидентите се регистрирани во Штип, Скопје, Охрид, Дебар и во Прилеп. Дел од случаите вклучуваат закани, физички напади и оружје. Утрово во 05:10 часот во Штип бил приведен 38-годишен штипјанец. Според МВР, тој ја нападнал сопругата иако имал судска забрана да ѝ се доближува.
Инцидентот се случил околу 01:00 часот. По расправија, следувал физички напад.
Синоќа во 21:00 часот во Скопје бил приведен 55-годишен маж. Неговиот 25-годишен син пријавил дека му се заканувал со остар предмет. Полицијата постапила по пријавата. Лицето било лишено од слобода.
Во скопско бил приведен 40-годишен маж. Неговите родители пријавиле агресивно однесување. Според пријавата, тој оштетил дел од покуќнината и упатувал закани во домот.
Осумнаесетгодишник од скопско пријавил напад од неговиот 19-годишен брат. Случајот се случил во дом во општина Сарај. По преземени мерки, полицијата извршила службен разговор со пријавениот.
Во Охрид бил извршен службен разговор со 46-годишен охриѓанец. Неговата сопруга пријавила закани по расправија. Кај него биле пронајдени пиштол, автоматска пушка и муниција. Оружјето било одземено.
Во Дебар бил приведен 45-годишен маж. Тој е осомничен дека физички ја нападнал сопругата. Во Прилеп, жена пријавила дека била нападната од сопругот. Според пријавата, тој употребил тврд предмет и ѝ нанел повреди.
Од Министерството за внатрешни работи информираат дека се преземаат мерки за расчистување на случаите. По целосно документирање ќе следуваат соодветни пријави против сторителите.