ЗАБОРАВЕН ОРГАН ВО ГРАДИТЕ Е ПОВРЗАН СО РАК И СРЦЕВИ ЗАБОЛУВАЊА Новото откритие ги збуни научниците

Според серија студии објавени во списанието Nature, луѓето со поздрав тимус имаат помала веројатност да развијат рак на белите дробови, поретко умираат од срцеви заболувања и генерално имаат подобра долгорочна прогноза.

Од плусинфо Објавено 06/05/2026 12:53:10

Најмистериозниот орган во човечкото тело, тимусот, би можел да биде клучот за долговечност и заштита од рак. Иако со децении лекарите го сметале за речиси бескорисен остаток од детството, новите истражувања покажуваат дека овој дволобусен орган, сместен зад градната коска, би можел да има многу поголема улога отколку што се сметаше претходно.

Орган што ги збунувал лекарите

Тимусот со векови ги збунува лекарите и анатомите. Старите Грци верувале дека е седиште на душата, додека на почетокот на 1960-тите еден добитник на Нобелова награда тврдел дека станува збор за „гробишта на клетки“, еволутивен остаток без вистинска функција.

Дури подоцна стана јасно дека тимусот игра клучна улога во развојот на имунолошкиот систем за време на детството, „учејќи“ ги Т-клетките како да препознаваат закани и како да не го напаѓаат сопственото ткиво.

Но, за време на пубертетот, тимусот почнува брзо да пропаѓа и да се претвора во масно ткиво.

Со децении беше запоставен. Се сметаше дека повеќе нема никаква важна функција по адолесценцијата.

Ново истражување

Новото истражување сега целосно ја менува таа слика. Според серија студии објавени во списанието Nature, луѓето со поздрав тимус имаат помала веројатност да развијат рак на белите дробови, поретко умираат од срцеви заболувања и генерално имаат подобра долгорочна прогноза.

Тие исто така подобро реагираат на имунотерапија, еден од најважните современи пристапи за лекување на рак.

Хуго Аертс, директор на Програмата за вештачка интелигенција во медицината во Massachusetts General Brigham, вели дека со години погрешно се претпоставувало дека тимусот станува ирелевантен по пубертетот.

Неговиот тим користел вештачка интелигенција за да анализира КТ скенирања на илјадници пациенти и пронашол јасна врска помеѓу здравјето на тимусот и долгорочните здравствени исходи.

Уште подраматични резултати дојдоа од студија од 2023 година објавена во списанието New England Journal of Medicine.

Истражувачите ги анализирале медицинските картони на возрасни чии тимуси биле хируршки отстранети, најчесто за да се добие полесен пристап до срцето за време на операција.

Во петте години по операцијата, овие пациенти имале повеќе од двојно поголема веројатност да умрат од која било причина во споредба со контролната група.

Тие исто така имале двојно поголем ризик од развој на рак и поголема склоност кон развој на автоимуни болести.

Одговорени клучните прашања

– Сите бевме шокирани. Ова има огромно влијание врз нашето разбирање на имунолошкиот систем и стареењето – рекол раководителот на студијата, Дејвид Скаден.

Научниците сега се обидуваат да одговорат на клучните прашања: Дали тимусот е директен двигател на подобро здравје или само показател за општата состојба на организмот?

Зошто кај некои луѓе пропаѓа побрзо отколку кај други?

И најважно, дали неговиот пад може да се забави или дури и да се врати во првобитната состојба?

Паола Бонфанти, биолог во Институтот „Френсис Крик“ во Лондон, верува дека интересот за тимусот требало да се појави многу порано. Таа се обидува да одгледа човечки тимус во лабораторија, со цел еден ден да го користи во трансплантациската медицина за да се намали потребата од агресивни лекови против отфрлање.

Дали може да се забави падот?

Научниците исто така истражуваат дали може да се забави природниот пад на тимусот. Доколку ова може да се постигне, тоа би можело да го подобри одговорот на постарите луѓе на вакцините, да го намали ризикот од автоимуни болести и да ја зголеми ефикасноста на имунотерапијата на ракот.

По децении занемарување, тимусот се враќа во центарот на науката како орган кој можеби го крие клучот за поздрав и подолг живот.