ТЕНЗИИ ВО СВЕТОТ, НО МУНДИЈАЛОТ ОСТАНУВА Светското фудбалско првенство ќе се игра, уверува ФИФА

ФИФА не размислува за одложување на Светското првенство во 2026 година и покрај глобалните тензии предизвикани од војната меѓу Соединетите Американски Држави и Израел против Иран. Според директорот за операции на турнирот, Хајмо Ширги, натпреварувањето е „преголемо“ за да биде одложено.

Ширги ова го изјави во Далас, каде што ќе биде сместен идниот Меѓународен медиумски центар за турнирот, кој треба да започне на 11 јуни. Тој нагласи дека организацијата внимателно ја следи ситуацијата со конфликтот и неговите последици.

– Да имав кристална топка, би можел да ви кажам што ќе се случи, но очигледно ситуацијата се развива и се менува од ден на ден. Ние внимателно ја следиме – изјави Ширги.

Светското првенство треба да се одржи од 11 јуни до 19 јули во Канада, САД и Мексико.

– Работиме со сите наши федерални и меѓународни партнери за да ја процениме ситуацијата. Секако дека Светското првенство ќе се одржи. Турнирот е преголем и се надеваме дека секој што се квалификувал ќе може да учествува – додаде тој.

Првенството во 2026 година ќе биде најголемо во историјата на фудбалот. Наместо досегашните 32, на турнирот ќе учествуваат 48 репрезентации.

Натпреварите ќе се играат на 11 стадиони во САД, три во Мексико и два во Канада.

Во меѓувреме, администрацијата на американскиот претседател Доналд Трамп воведе забрана за патување за четири земји кои се квалификуваа на турнирот – Иран, Брегот на Слоновата Коска, Хаити и Сенегал. Сепак, најавено е дека за играчите, членовите на репрезентациите и нивните најблиски семејства ќе биде направен исклучок.

Ширги додаде дека ФИФА е во постојан контакт со иранската фудбалска федерација, но не откри детали од разговорите.

Функционерите на ФИФА во Далас ги претставија и плановите за голем фестивал на навивачи низ целиот град, кој ќе трае 34 дена за време на турнирот.

Според Ширги, токму ваквите настани ја покажуваат вистинската сила на Светското првенство.

– Со оглед на состојбата во светот денес, ова ќе биде одлична можност луѓето да се соберат. Светското првенство е навистина глобален настан кој ги зближува сите – рече тој, потсетувајќи на атмосферата на претходните турнири во Катар и Русија.

Организаторите се соочија и со критики поради високите цени на билетите.

Билетите за прва категорија достигнуваат цена од 8.680 долари, за втора категорија 5.575 долари, а за трета 4.185 долари. За натпреварите од првото коло цените се пониски, но и понатаму високи за многу навивачи.

Ширги објасни дека дополнителниот рок од 48 часа за купување билети бил воведен за да им се даде шанса на навивачите кои не успеале да добијат билет во посакуваната категорија.

По критиките, ФИФА најави дека ќе пушти и неколку стотици билети по цена од 60 долари по натпревар, кои ќе бидат распределени преку 48-те национални фудбалски асоцијации за нивните редовни навивачи.

Во јавноста веќе се појавија и повици за можен бојкот на турнирот.

Извршниот директор на Германска фудбалска асоцијација, Андреас Ретиг, изјави дека поради безбедносните и политичките тензии „во моментов не се радува на претстојното Светско првенство“.

Сличен став изнесе и потпретседателот на „DFB“, Оке Гетлих, кој смета дека националните репрезентации треба сериозно да размислат за бојкот на турнирот поради политиките на администрацијата на Трамп и нарушените односи со европските сојузници.